6 مووشه‌ك ئاراسته‌ی فڕۆكه‌خانه‌ی به‌غدا كران
"له رێگه‌ی سیستمی دژه مووشه‌كه‌وه به‌رپه‌چی هێرشه‌كه درایه‌وه"
K24- هه‌ولێر:
په‌یامنێری كوردستان 24 له به‌غدا رایده‌گه‌یه‌نێت، به‌ره‌به‌یانی ئه‌مڕۆ هه‌ینی 28ـی كانوونی دووه‌م / یه‌نایه‌ری 2022، شه‌ش مووشه‌ك له فڕۆكه‌خانه‌ی نێوده‌وڵه‌تی به‌غدا كه‌وتنه خواره‌وه.
به گوێره‌ی زانیارییه‌كانی په‌یامنێری كوردستان 24 له به‌غدا، كاتژمێر 4:30 به‌ره‌به‌یانی ئه‌مڕۆ هه‌ینی، 6 مووشه‌ك له فڕۆكه‌خانه‌ی نێوده‌وڵه‌تی به‌غدا كه‌وتنه خواره‌وه.
په‌یامنێری كوردستان 24 روونیكرده‌وه، بۆ جاری دووه‌مه به‌شه مه‌ده‌نییه‌كه‌ی فڕۆكه‌خانه‌ی به‌غدا، كه هاووڵاتیان رۆژانه بۆ گه‌شتی ده‌ره‌وه و ناوه‌وه به‌كاری ده‌هێنن، له‌لایه‌ن میلیشیاكانه‌وه مووشه‌ك باران ده‌كرێت، له رێگه‌ی سیستمی دژه مووشه‌كه‌وه به‌رپه‌چی هێرشه‌كه دراوه‌ته‌وه.
زانیارییه سه‌ره‌تاییه‌كان ئه‌وه ده‌رده‌خه‌ن، له ئاكامی ئه‌و هێرشه زیانی ماددی به‌ر ژماره‌یه‌ك فڕۆكه كه‌وتووه، تا ئێستاش زیانی گیانی رانه‌گه‌یه‌ندراوه.
له‌لایه‌كی دیكه‌وه، هاوپه‌یمانی نێوده‌وڵه‌تی دژی داعش له عێراق راگه‌یه‌ندراوێكی بڵاوكرده‌وه، تێیدا هاتووه، له‌م مانگه‌دا دووه‌م جاره فڕۆكه‌خانه‌ی نێوده‌وڵه‌تی به‌غدا ده‌كرێته ئامانج.
هاوپه‌یمانی نێوده‌وڵه‌تی راشیگه‌یاند، مووشه‌كه‌كان له به‌شی مه‌ده‌نی فڕۆكه‌خانه كه‌وتوونه‌ته خواره‌وه.
هێڵی ئاسمانی عێراق جه‌ختی له‌وه كرده‌وه، گه‌شته‌كان له فڕۆكه‌خانه‌ی به‌غدا به‌رده‌وام ده‌بن.
