یۆرگن کلۆپ بەهۆی تۆمارێکی دەنگییەوە سزا دەدرێت
K24 - هەولێر
راپۆرتە رۆژنامەوانییەکان ئاماژە بەوە دەکەن، بە ئەگەرێکی زۆرەوە فیدراسیۆنی تۆپی پێی ئینگلتەرا یۆرگن کلۆپ راهێنەری لیڤەرپوول سزا دەدات بەهۆی ئەو گفتوگۆیانەی لەگەڵ پۆڵ تێرنێی ناوبژیوانی یاریی نێوان لیڤەرپوول و تۆتێنهام کردوویەتی.
راهێنەرە ئەڵمانییەکە دوای تەواوی بوونی یارییەکە بۆ ئاهەنگگێڕان بەرەو رووی ناوبژیوانی چوارم رۆیشتووە و هاواریکردووە بەسەریدا.
بەهۆی ئەو رەفتارەوە ناوبژیوانی یارییەکە کارتی زەردی بە رووی کلۆپ بەرزکردەوە، پاشان راهێنەری لیڤەرپوول لە کۆنگرەی رۆژنامەوانی دوای یارییەکە هاتە دەرەوە و ئاماژەی بەوەکرد، لە کاتی یارییەکە ناوبژیوان قسەی نەشیاوی پێ وتووە.
لیژنەی ناوبژیوانی یارییەکانی خولی ئینگلیزیی رایانگەیاند، دەنگی تەواوی ناوبژیوانان بەستراوەتەوە بە سیستەمێکی دەنگیی و هەمووی تۆماردەکرێت و پۆڵ تێرنیی لە یارییەکەدا پیشەییانە مامەڵەی کردووە و هیچ قسەیەکی بە راهێنەرەکە نەگوتووە.
رۆژنامەی دەیلی مەیڵ ئەوەی بڵاوکردووەتەوە لە ئێستادا فیدراسیۆنی تۆپی پێی ئینگلتەرا لێکۆڵینەوە لە رووداوەکە دەکەن و لەوانەیە راهێنەرە 55 ساڵییەکە سزا بدرێت.
رۆژنامەکە ئاماژەی بەوەشکردووە ئەگەر سزاکە بەسەر کڵۆپدا بسەپێت، لیژنەی ناوبژیوانان و فیدراسیۆنە ئینگلیزییەکە تۆمارە دەنگییەکان بڵاودەکەنەوە.
یۆرگن كڵۆپ له مانگی ئۆكتۆبه‌ری 2015 یانه‌ی دۆرتمۆندی جێهێشت و بووه راهێنه‌ری لیڤه‌رپوول، له‌گه‌ڵ ئه‌و یانه‌یه سه‌رپه‌رشتی 426 یاریی كردووه، 262 بردنه‌وه، 87 به‌رامبه‌ربوون و 77 دۆڕانی هه‌یه، دیارترین ده‌ستكه‌وته‌كانی كڵۆپ له‌گه‌ڵ رێدز بردنه‌وه‌ی نازناوی چامپیۆنزلیگ و پرێمه‌رلیگ بووه، دووجاریش خه‌ڵاتی باشترین راهێنه‌ری جیهانی به‌ده‌ستهێناوه.
