ئەندامێکی لیژنەی دارایی بە دووری دەزانێت دانیشتنی سێشەممەی پەرلەمانی عێراق بۆ پەسەندکردنی بودجە بەڕێوەبچێت
K24 - هەولێر
ئەندامێکی لیژنەی دارایی پەرلەمانی عێراق بە دووری دەزانێت رۆژی سێشەممەی داهاتوو پەرلەمان بۆ پەسەندکردنی پڕۆژەیاسای بودجە کۆببێتەوە و ئاماژە بەوە دەدات، تا کێشەکانی بودجە لەگەڵ هەرێمی کوردستان چارەسەر نەکرێن، ئەستەمە کۆبوونەوەکە بکرێت.
مسته‌فا كه‌رعاوی، ئەندامی لیژنه‌ی دارایی پەرلەمانی عێراق بە ماڵپەری "مەعلومە"ـی عێراقی راگەیاندووە، كاره‌كانی لیژنه‌ی دارایی راگیراون و هێشتا رێككه‌وتن له‌سه‌ر ده‌ستپێكردنه‌وه‌ی كاره‌كانیان نه‌كراوه، بۆیه پێناچێت رۆژی سێشه‌ممه دانیشتنی په‌رله‌مان به‌ڕێوه‌بچێت.
به‌گوته‌ی كه‌رعاوی په‌سه‌ندكردنی بودجه پێویستی به بڕیاری سیاسییه و هێشتا كاروباره‌كانی لیژنه‌ی داراییش ته‌واو نه‌بوونە.
ئەو ئەندامەی لیژنەی دارایی پەرلەمانی عێراق هیواشی خواست كاره‌كانی لیژنه‌كه‌یان بۆ ته‌واوكردنی پڕۆژه‌یاسای بودجه دەستپێبکەنەوە بۆ ئه‌وه‌ی پڕۆژه‌یاساكه بخرێته ده‌نگدانه‌وه.
رۆژی شەممە 27ـی ئایاری 2023، شاخەوان عەبدوڵڵا، جێگری سەرۆکی پەرلەمانی عێراق نووسراوێکی ئاراستەی لیژنەی دارایی پەرلەمانی عێراق کرد و تێیدا ئاماژەی بەوەکردبوو، بەگوێرەی ماددەی 73 لە پەیڕەوی ناوخۆیی پەرلەمانی عێراق کە ژمارەی ئەندامانی لیژنەکانی دیاریکردووە کە نابێت لە 21 ئەندام زیاتر بێت و دەسەڵاتی بە سەرۆکایەتی پەرلەمانداوە کە هەمواری ژمارەی ئەندامانی لیژنەکان بکات بە مەرجێک لە دوو ئەندام زیاتر نەبێت، کەچی لە کۆبوونەوەکاندا دەرکەتووە لیژنەی دارایی پەرلەمانی عێراق لە 24 ئەندام پێکهاتووە.
هەر لە نووسراوەکەدا، شاخەوان عەبدوڵڵا کارەکانی لیژنەی دارایی هەڵپەسارد تا ئەو کاتەی پێداچوونەوە بە پەیکەری پێکهێنانی لیژنەکە دەکرێت و ژمارەی ئەندامانی لیژنەکە بۆ 23 ئەندام لەبری 24 ئەندام رێکدەخرێتەوە.
رۆژی پێنجشەممە 25ـی ئایاری 2023، لیژنەی دارایی پەرلەمانی عێراق لە دوا کۆبوونەوەی خۆیدا لەبارەی گفتوگۆکردن و ئامادەکردنی کۆتا رەشنووسی پرۆژەیاسای بودجە بۆ دەنگدان لەسەری لەناو هۆڵی پەرلەماندا، گۆڕانکاری لە چەند بڕگەیەکی هەردوو ماددەی 13 و 14ـی تایبەت بە داهاتی نەوت و شایستە داراییەکانی هەرێمی کوردستان کرد.
