"ریال مه‌درید به‌هۆی 2 هۆكار له گواستنه‌وه‌ی ئێمباپێ كشاوه‌ته‌وه"
میدیاکانی ئیسپانیا و به‌ریتانیا ئاشکرایان کرد کە ڕیاڵ مەدرید لەناکاو پاشەکشەی کرد لە گواستنه‌وه‌ی كلیان ئێمباپێ كردووه له كاتێكدا چه‌ندان ساڵه ئه‌و یاریزانه ئامانجی یانه مه‌دریدییه‌كه‌یه.
له هاوینی داهاتوو گرێبه‌ستی ئێمباپێ له‌گه‌ڵ پاریس سانجێرمان كۆتایی دێت، به‌مه‌ش ریال مه‌درید ده‌توانێت به گرێبه‌ستێكی بێبه‌رامبه‌ر ئه‌و یاریزانه بگوازێته‌وه، بەڵام گواستنەوەی ئێمباپێ ئاسان نابێت، چونكه ریال مه‌درید ده‌بێت به‌رزترین مووچه له یانه‌كه‌ی بداته ئێمباپێ جگه له‌وه‌ش ده‌بێت شیرینی گرێبه‌ست و پاداشتی گواستنه‌وه‌ی بداته كلیان ئێمباپێ.
ڕیاڵ مەدرید پەیوەندییەکی نزیکی لەگەڵ هێرشبه‌ره ته‌مه‌ن 24 ساڵییه‌كه‌ی پاریس هه‌یه، پێشبینی دەکرا وەرزی داهاتوو لە یاریگای سانتیاگۆ بێرنابیۆ ئه‌م یاریزانه پێشكه‌شی هانده‌رانی شاهانه‌كان بكرێت، بەڵام بەپێی زانیارییەکان یانە زەبەلاحەکەی چامپیۆنزلیگ بەهۆی زیاده‌ڕۆییه‌كی زۆری دارایی له گواستنه‌وه‌ی ئێمباپێ كشاوه‌ته‌وه.
بەگوێرەی ڕۆژنامەی "ئاس"ـی ئیسپانی، ئێمباپێ دەیەوێت مووچەی ساڵانەی 35 ملیۆن یۆرۆ دوای لێبڕینی باج وەربگرێت و پاداشتی گرێبەستی گرێبەست لەگەڵ نزیکەی 100 ملیۆن یۆرۆ وەربگرێت، به‌ڵام ریال مه‌درید نایه‌وێت ئه‌م بڕه پاره‌یه بدات.
لەلایەکی دیکەوە ئێمباپێ دەیەوێت لە باڵی چەپ یاری بکات، ئه‌و شوێنه لەلایەن ڤینیسیۆس جونیۆری ئەستێرەی ئێستای ڕیال مەدریدەوە داگیر کراوە، ئه‌مه‌ش نیگه‌رانی لای ریال مه‌درید دروست كردووه و ترسی له‌وه‌یه گواستنه‌وه‌ی ئێمباپێ دۆخێكی خراپ له نێو ژووری جلگۆڕین دروست بكات.
له لایه‌كی دیكه‌وه پێگه‌ی میره‌ری بریتانیا ئاماژه‌ی بۆ ئه‌وه كردووه ئێستا لیڤەرپوول لە دۆخێکی باشتردایە بۆ تەواوکردنی گرێبەستی ئێمباپێ.
دایکی ئێمباپێ، فایزه ئەلعەماری کە هاوکات وەک بریکارەکەی کاردەکات، هاندەری لیڤه‌رپووله، پێشتریش ئەو یاریزانە ئاشکرای کردبوو کە پێش ئەوەی لە ساڵی 2017 لە مۆناکۆوە پەیوەندی بە یانەی پاریس سانجێرمانەوە بکات، گفتوگۆی سەبارەت بە گواستنەوەی بۆ لیڤه‌رپوول ئه‌نجام داوه.
یۆرگن کلۆپی ڕاهێنەری ئەڵمانی لیڤەرپوول پێش یاریی یانەکەی بەرامبەر پاریس سانجێرمان لە چامپیۆنزلیگ لە ساڵی 2018 سەرسامی خۆی بۆ ئێمباپێ دەربڕیبوو.
ڕاهێنەرە ئەڵمانییەکە ئه‌وكات گوتی: من ئێمباپێم خۆشدەوێت، چونكه كوڕێكی باشه و ئه‌ستێره‌یه‌كی گه‌وره‌یه.
كلیان ئێمباپێ مانگی داهاتوو ته‌مه‌نی ده‌بێته 24 ساڵ، له‌گه‌ڵ پاریس سانجێرمان به‌شداریی له 274 یاریی كردووه، 224 گۆڵ و 99 ئاسیستی هه‌یه.
