عوسمان عه‌لی: به‌شداری مه‌سرور بارزانی له داڤۆس گرنگه له كاتێكدا هه‌وڵێك هه‌یه بۆ په‌راوێزخستنی هه‌رێمی كوردستان
K24 - هەولێر:
سه‌رۆكی رێكخراوی تاسك بۆ لێكۆڵینه‌وه‌ی ستراتیژی ئاماژه به‌وه ده‌كات به‌شداری سه‌رۆكوه‌زیران مه‌سرور بارزانی له داڤۆس گرنگه، چونكه هه‌وڵێكی عێراقی و هه‌رێمی هه‌یه بۆ په‌راوێزخستنی رۆڵی دیپلۆماسی هه‌رێمی كوردستان.
ئه‌مڕۆ (دووشه‌ممه 15ـی كانوونی دووه‌می 2024) عوسمان عه‌لی، سه‌رۆكی رێكخراوی تاسك بۆ لێكۆڵینه‌وه‌ی ستراتیژی سه‌باره‌ت به به‌ڕێوه‌چوونی كۆڕبه‌ندی داڤۆس و به‌شداری سه‌رۆكوه‌زیران مه‌سرور بارزانی تایبه‌ت به كوردستان24 رایگه‌یاند، به‌شداری كورد و هه‌رێمی كوردستان له كۆڕبه‌ندی داڤۆس و كۆڕ و كۆڕبه‌ند و كۆنفرانسه جیهانییه‌كانی دیكه گرنگی تایبه‌تی هه‌یه، به‌تایبه‌ت كه تاوه‌كوو 2003 كورد له هیچ كۆڕبه‌ند و كۆنفرانسێكی نێوده‌وڵه‌تیدا نوێنه‌رایه‌تی فه‌رمی و له‌و شێوه ئاستبه‌رزه‌ی نه‌بوو.
عوسمان عه‌لی سه‌رنجی بۆ ئه‌وه راكێشا، به‌شداری سه‌رۆكوه‌زیران مه‌سرور بارزانی له كۆڕبه‌ندی داڤۆسدا ده‌رفه‌تێكه بۆ زیاتر دروستكردنی هه‌ماهه‌نگی سیاسی، دیپلۆماسی، ئابووری و ئاسایشی و وه‌به‌رهێنان له‌نێوان هه‌رێمی كوردستان و وڵاتاندا.
سه‌رۆكی رێكخراوی تاسك بۆ لێكۆڵینه‌وه‌ی ستراتیژی باسی له‌وه‌ش كرد، هه‌وڵ له به‌غدا و له‌لایه‌ن وڵاتانی هه‌رێمی هه‌یه بۆ ئه‌وه‌ی رۆڵی دیپلۆماسیه‌تی هه‌رێمی كوردستان له‌سه‌ر ئاستی نێوده‌وڵه‌تیدا په‌راوێز بخه‌ن، به‌ڵام پێویسته هه‌رێمی كوردستان به‌رگری له رۆڵی خۆی بكات و پێگه‌ی جیۆسیاسی و ئابوورییه‌كه‌ی زیاتر به كۆمه‌ڵگه‌ی نێوده‌وڵه‌تی بناسێنێت.
عوسمان عه‌لی ئاماژه‌ی به‌وه‌ش كرد، بوون و به‌شداری سه‌رۆكوه‌زیران مه‌سرور بارزانی له داڤۆس و كۆڕبه‌نده‌كانی دیكه‌دا، مافێكی ده‌ستووری هه‌رێمی كوردستانه كه له مادده‌ی 21ـی ده‌ستووری عێراق هێمای بۆ كراوه و ئه‌و مافه‌ی پێدراوه له زۆربه‌ی مینبه‌ره‌كانی پلاتفۆرمه جیهانییه‌كاندا نوێنه‌رایه‌تی خۆی بكات و كار بكات بۆ پێشخستن و گه‌شه‌پێدانی سیاسی و ئابووری و ئاسایش.
تیشكی خسته سه‌ر ئه‌وه‌ش كه بوونی سه‌رۆكوه‌زیران له كۆڕبه‌نده‌كه بایه‌خێكی گه‌وره‌ی ناوچه‌یی هه‌یه به‌تایبه‌ت كه ئێستا رۆژهه‌ڵاتی ناوه‌ڕاست جه‌نگی تێدا له ئارادایه و به‌ره‌و وه‌رچه‌رخان هه‌نگاو ده‌نێت كه پشكی ئه‌و وه‌رچه‌رخانه به‌ر عێراقیش ده‌كه‌وێت، بۆیه سه‌رۆكوه‌زیران له نزیكه‌وه ئاگاداری پێشهات و گۆڕانكارییه‌كان ده‌بێت.
ئەمڕۆ دووشەممە، 15-01-2024، مەسرور بارزانی، سەرۆکی حکومەتی هەرێمی کوردستان بە سەرۆکایەتیی شاندێک بۆ بەشداریکردن لە کۆڕبەندی ئابووری جیهانی لە داڤۆس؛ بەرەو سویسرا بەڕێکەوت.
حکومەتی هەرێمی کوردستان لە راگەیەندراوێکدا ئاماژەی بەوە کردووە، مەسرور بارزانی لە پەراوێزی بەشداریکردنی لە کۆڕبەندی ئابووری جیهانیی داڤۆس، لەگەڵ ژمارەیەک لە سەرۆک و سەرۆک وەزیران و بەرپرسانی باڵای وڵاتانی رۆژهەڵاتی ناوەڕاست و ئەوروپا و جیهان کۆدەبێتەوە و لە دیدارەکانیدا، چەندین تەوەر و پرسی ناوخۆیی و هەرێمی و جیهانی تاوتوێ دەکات، لەوانەش پەرەپێدانی پەیوەندیی دوولایەنە بەتایبەتی لە بوارەکانی ئابووری و وەبەرهێناندا.
ئاماژە بەوەش کراوە، بڕیارە سەرۆکوەزیرانی هەرێمی کوردستان لە پانێلێکی کۆڕبەندەکەشدا بەشدار بێت، کە تایبەتە بە ململانێ و ناکۆکییەکانی رۆژهەڵاتی ناوەڕاست.
لە راگەیەندراوەکەدا هاتووە: "بەشداریی سەرۆکی حکومەت لە کۆڕبەندی داڤۆس، لە چوارچێوەی هەوڵە بەردەوامەکانیدایە بۆ پتەوکردنی پەیوەندییەکانی هەرێمی کوردستان لەگەڵ وڵاتان و تاوتوێکردنی ئەو پرسانەی کە پەیوەندییان بە ئایندەی عێراق و ناوچەکە بە گشتی هەیە".
شاندی هەرێمی كوردستان لە ژمارەیەک لە بەرپرسانی حکومی و وەبەرهێنەر و خاوەنکارانی کوردستان پێکهاتووە کە یەکەمجارە بەشداری لە داڤۆس دەکەن. هەروەها بە دەستپێشخەری و راسپاردەی سەرۆکوەزیران، ماڵی کوردستان لە داڤۆس دەکرێتەوە.
کۆڕبەندی داڤۆس 2024، ئەمڕۆ دووشەممە بە درووشمی" بنیاتنانەوەی متمانە" دەستیپێکرد و تا رۆژی هەیینی، 19-01-2024، بەردەوام دەبێت. کۆڕبەندی ئەمساڵ پێشوازی دەکات لە 100 سەرۆک حکومەت و زۆربەی دەزگا و رێکخراوە نێودەوڵەتییەکان و هەزار هاوبەشی کۆڕبەندەکە و سەرکردە کۆمەڵایەتییەکان. هەروەها شارەزایان و نوێنەرانی گەنجان، کارسازان و میدیاکانیش ئامادە دەبن.