پسپۆرێكی ئابووری بۆ ئاژانسی فه‌رمی عێراق: كێشه‌ی مووچه‌ی فه‌رمانبه‌رانی هه‌رێمی كوردستان به‌ره‌و چاره‌سه‌ربوون ده‌چێت
K24 – هەولێر:
پسپۆرێكی ئابووری ده‌ڵێت، كێشه‌ی مووچه‌ی فه‌رمانبه‌رانی هه‌رێمی كوردستان به‌ره‌و چاره‌سه‌ربوون ده‌چێت.
باسم ئه‌نتوان پسپۆری ئابووری، به ئاژانسی فه‌رمی عێراقی راگه‌یاندووه، پرسی مووچه‌ی فه‌رمانبه‌رانی هه‌رێمی كوردستان به‌ره‌و چاره‌سه‌ربوون ده‌چێت، نیازی باش بۆ چاره‌سه‌ركردنی ئه‌و كێشه له‌لایه‌ن هه‌ردوولاوه هه‌یه.
ئه‌نتوان گوتیشی: "ته‌وافوقی سیاسی پرسێكی گرنگه، به‌هۆیه‌وه كێشه هه‌ڵپه‌سێدراوه‌كانی نێوان هه‌ولێر و به‌غدا چاره‌سه‌ر ده‌بن".
جه‌ختیشیكرده‌وه، ناكرێت فه‌رمانبه‌رانی هه‌رێمی كوردستان باجی ناكۆكییه سیاسییه‌كان بده‌ن.
ئه‌وه‌شی خسته‌ڕوو، پێویسته به‌شێك له لایه‌نه سیاسییه‌كانی هه‌رێمی كوردستان ببنه به‌شێك له چاره‌سه‌ریی كێشه‌كان، نه‌وه‌ك كێشه، بۆ ئه‌وه‌ی هه‌موو لا بگه‌ن به ته‌وافوق و رێككه‌وتن.
رۆژی شه‌ممه، 6ـی نیسانی 2024، نێچیرڤان بارزانی، سه‌رۆکی هه‌رێمی کوردستان، گه‌یشته به‌غدا.
دوای هەوڵە بەردەوام و پەیوەندییەکانی سەرۆکوەزیران مەسرور بارزانی لەگەڵ سەرۆکوەزیرانی عێراق، دواجار بە ئەنجام گەیشت و لە راگەیەندراوەکەی ڕۆژی (3ـی نیسانی 2024)ـی سەرۆکی حکوومەتی هەرێمی کوردستاندا هاتووە: "لەم دوو ڕۆژەدا دابەشکردنی مووچەی مانگی شوبات کۆتایی دێت و هەوڵ دەدەین بەر لە جەژن، دەست بە دابەشکردنی مووچەی مانگی ئاداریش بکرێت".
لێکنزیکبوونەوەی ئەمجارەی هەولێر و بەغدا بۆ رێککەوتن لەسەر پرسی مووچە بەتایبەتی دوای بڕیارەکانی دادگای فیدراڵی، دوای سەردانە بەرهەمدارەکەی سەرۆکی حکوومەتی هەرێمی کوردستان دێت بۆ واشنتن لە (24ـی شوباتی 2024) و کۆبوونەوەی لەگەڵ وەزیری دەرەوەی ئەمەریکا و بەرپرسانی باڵای کۆشکی سپی و کۆنگرێس و وەزارەتەکانی بەرگری و گەنجینە کە لە هەموو وێستەگەی کۆبوونەوەکاندا، جەختی لە مافە دەستوورییەکانی هەرێمی کوردستان و پێکهاتەکان و کێشەکانی نێوان هەولێر و بەغدا کردەوە لە نێویشیاندا، دابینکردنی شایستە داراییەکان و ڕێزگرتن لە قەوارەی دەستووریی هەرێمی کوردستان.