هەژارەکی ئاکرێ دەولەمەند کر
نووسەری بابەت: سەركەفت رەشید - مامۆستای زانكۆ
باژێرێ ئاکرێ هەتا بەری دەستپێکرنا یاریێن خولا نایابا کوردستانێ یا وەرزێ ئەڤ سالە ژلایێ ئامارێن یاریا تەپا پێی ڤە باژێرەکێ هەژار و دەست کورت بوو، هەتا پشتی حەفت گەرێن دەستپێکا خۆلێ ژی هەر ب هەژاری ما بوو، راهێنەرێ وێ "يونس سليمان"نە شیا چ ئامارێن دلخوشکەر بۆ ئەڤی باژێری بەرهەم بینیت چونکی ژ سەرجەمێ حەفت یاریان بتنێ 2سەرکەفت و 2 وەکهەڤی و 3 خوسارەتی هەبوون.
پشتی ئەڤان ئەنجامان و دەست ژ کارکێشانا راهێنەری، هەژارێ هاریکار ل سەر داخوازیا کارگێریا یانەیا ئاکرێ ب شێوەکێ دەمکی ئەرکێ راهێنەرایەتیا تیمێ وەرگرت کو ل وی دەمی ئاکرێ ل رێزا 13 دهات، پشتی بورینا شەش گەران هەژارێ ئاکرێ شەش سەرکەفتنێن دیڤ ئێک ب رێکا یارێزانێن خۆ تومارکرن و هەژاری ئاکرێ بەرەڤ ئامارێن دەولەمەندیێ بڕ و پێشڤە هاتە رێزێن ئێکێ د خۆلا نایابا کوردستانێ دا و ژ سەرجەمێ 23 یاریان هەژاری ئەڤ ئامارە دروستکرن 12 سەرکەفتن 8 وەکهەڤی و بتنێ 3خوسارەتی، و ب ئەڤان ئەنجامان و بۆ جارا ئێکێ دیروکا خودا ئاکرێ بۆ قارەمانا خۆلا نایابا کوردستانێ، هەژارێ راهێنەر دڤیا ئاکرێ دکوپا کوردستانێ ژی دا دەولەمەند بکەت و دسێ یاریان دا سەرکەفتن لسەر شێروانە تومارکر ب 2 گولا بەرامبەر گولەکێ و ب هەمان ئەنجام سەرکەفتن لسەر هەولێرێ ژی تومارکر و ب ئەنجامێ 3 گولا بەرامبەر 2 گولا سەرکەفتن لسەر زاخۆ تومار کڕ و گەهشتە یاریا دویماهیێ ژ کۆپا کوردستانێ بەلێ نەشیان د یاریا دویماهیێ دا لسەر ئەردێ یانەیا زاخۆ ببنە قارەمان دەمێ ب ئەنجامێ 2 گولا بەرامبەر گولەکێ توشی خوسارەتیێ بووین دگەل تیما یانەیا هندرین، هەژارێ راهێنەر ژبلی ئامارێن بکۆم ئامارێن تاکە کەسی ژی بۆ ئاکرێ تومارکرن دەمێ ل هەیڤا 12 بویە باشترین راهێنەر ب پتریا دەنگان کو ژ سەرجەمێ 51 دەنگان 46 دەنگ بدەستخۆڤە ئیانان و هەیڤا ئادارا ئەڤ سالە ژی ب 46 دەنگان بۆ جارا دوویێ ژی وەک باشترین راهێنەر هاتە دەستنیشانکرن، و ل دویماهیا خولا نایابا کوردستانێ ژی وەک باشترن راهێنەرێ خولا نایاب هاتە دەستنیشانکرن دەمێ ژسەرجەمێ 49 دەنگا 47 دەنگ بدەست خۆڤە ئیناین، ئانکۆ ب کورتی پشتی هەژار بۆیە راهێنەرێ تیما تەپا پێی یا ئاکرێ ئەنجام ل دویف ئامارێن دلخوشکەر هاتنە تومارکرن، و ژ سەرجەمێ 27 یاریان ئاکرێ 15 سەرکەفتن و 8 وەکهەڤی و 4 شکەستن تومارکرن، و ب ئەڤان ئاماران هەژاری سابری ئاکرێ دەولەمەند کر.
