کچە کوردێک مەشخەڵەی ئۆڵمپیکی پاریس هەڵدەگرێت

شیلان شەماڵ مستەفا کە کچە کوردێکی دانیشتووی فەرەنسایە رەزامەندی وەرگرت بۆ ئەوەی ببێتە یەکێک لەو کەسانەی بەنۆرە مەشخەڵی ئۆڵمپیکی پاریس هەڵدەگرن و ئەم مەشخەڵە لە ئەسینای پایتەختی یۆنانەوە دەگەیێننە پاریسی پایتەختی فەرەنسا.
شیلان لە دیالە لەدایک بووە و بەهۆی ئیش و کاری باوکییەوە لە چەند شارێکی جیاوازی عێراق ژیاوە، لە ساڵی 2005 باوکی شیلان لە لیبیا گرێبەستێکی ئیشکردنی بۆ دێت و لەگەڵ خانەوادەکەی روو لەو وڵاتە دەکەن، دواتر لەگەڵ خانەوادەکەی بڕیار دەدەن روو لە ئەوروپا بکەن و شیلان تەمەنی 14 ساڵان بوو ئەو کاتەی گەیشتنە فەرەنسا و لەوێ نیشتەجێ بوون.
شیلان لە خوێندن سەرکەوتوو بوو، بەڵام شوێنە راستەقینەکەی لە یاریگە وەرزشییەکان دۆزیەوە، شیلان لە تەمەنێکی بچووک یاریی بالەی کردووە و دواتر روو لە یاریی تایکواندۆ و کاراتێ دەکات و لەم یارییە بەردەوام دەبێت و مەشق و راهێنان دەکات، دوای ساڵانێک شیلان دەبێتە یەکێک لە پاڵەوانەکانی یاریی هونەرە جەنگییەکان.
ئەو بانگهێشتنامەیەی کە چاوەڕێی دەکرد گەیشتە لای شیلان لەگەڵ رێنماییەکانی جلوبەرگ و مێدالیایەک کە ناوی خۆی لەسەرە، بڕیاریشە لە 22ی مانگی داهاتوو شیلان مەشخەڵی ئۆڵمپیکی پاریس بۆ ماوەی 5 خولەک هەڵگرێت و دەبێتە مێژوویەکی گەورە بۆ ئەم کچە کوردە.