دیوانی چاودێریی دارایی فیدراڵی: تیمێکی وردبینمان لە هەرێمی کوردستانە

K24 - هەولێر:

دیوانی چاودێریی دارایی فیدراڵی ڕایگەیاند: دەستیان بە پرۆسەی وردبینی کردنی میلاک و مووچەی فەرمانبەرانی شارستانیی و سەربازیی هەرێمی کوردستان کردووە.

دیوانی چاودێریی دارایی فیدراڵی لە ڕاگەیەندراوێکدا ئاماژەی بەوە کردووە: بۆ جێبەجێکردنی بڕیاری دادگای فیدراڵی و بۆ تەواوکردنی پابەندییەکانیان هەروەک لە یاسای بودجەی فیدراڵی بۆ ساڵی 2023 هاتووە، دەستیان بە پرۆسەی وردبینی کردنی میلاک و مووچەی فەرمانبەرانی شارستانیی و سەربازیی هەرێمی کوردستان کردووە.

لە ڕاگەیەندراوێکدا هاتووە: تیمێکی چاودێری دارایی لە ڕۆژی چوارشەممە، 10ـی تەمموزی 2024، بە هەماهەنگی لەگەڵ دیوانی چاودێریی دارایی هەرێمی کوردستان دەستی کردووە بە کاری چاودێری و وردبینی کردنی میلاک و مووچەی سەربازیی و شارستانی لە هەرێمی کوردستان.

هاوکات، دیوانی چاودێریی دارایی فیدراڵی باسی لەوەش کردووە: تاوەکوو ئێستا ژمارەیەک کۆبوونەوەیان لەگەڵ دامودەزگا پەیوەندیدارەکانی حکوومەتی هەرێمی کوردستان کردووە بە مەبەستی سەرخستنی ئەو پرۆسەیە.

پێشتریش کوردستان24 بڵاوی کردەوە: ئەمڕۆ چوارشەممە، 10ـی تەمموزی 2024، شاندێکی دیوانی چاودێریی دارایی فیدراڵی سەردانی هەولێری کرد و لە دیوانی وەزارەتی پێشمەرگە دەستی کردووە بە وردبینی لە لیستی مووچەی هێزەکانی پێشمەرگە و هێزە ئەمنییەکانی دیکەی هەرێمی کوردستان.

ئەمە لە کاتێکدایە، تاوەکو ئێستا وەزارەتی دارایی عێراق مووچەی مانگی ئایار و حوزەیران (پێنج و شەش)ـی هێزە ئەمنییەکانی هەرێمی کوردستانی خەرج نەکردووە. حکوومەتی هەرێمی کوردستانیش جەخت لەوە دەکاتەوە، ئەوان هەموو داواکارییەکانی وەزارەتی دارایی عێراقیان جێبەجێ کردوون، بەڵام مووچەی هێزە ئەمنییەکان هەر جارەو بەبیانووی جیاواز نانێردرێت.