وێنەیەك نزیكبوو ژیانی وەرزشی رۆدیگێر لەگەڵ ئەڵمانیا کۆتایی پێبهێنێت
ئانتۆنیۆ رۆدیگێری یاریزانی ریاڵ مەدرید و هەڵبژاردەی ئەڵمانیا شەش مانگ پێش ئێستا لە تۆڕە کۆمەڵایەتییەکان وێنەیەکی خۆی بڵاوکردەوە و بە لێشاو رەخنەی تووندی لێگیرا.
رۆژنامەی بێڵدی ئەڵمانی ئەوەی ئاشکراکردووە، کە یاریزانە موسوڵمانەکە وێنەیەکی خۆی بە باگراوندێکی ئیسلامیی بڵاوکردووەتەوە و رەخنەیەکی زۆری لێگیراوە، ئەمەش وای لە رۆدیگێر کردووە بڕیار بدات بە یەکجاری واز لە یاریی نێودەوڵەتی بهێنێت و چی دیکە یاریی بۆ هەڵبژاردەی ئەڵمانیا نەکاتەوە.
لە وێنەکەدا رۆدیگێر چاکەتێکی سپی لەبەردایەوە و پەنجەی ئاماژەی بەرزکردووەتەوە وەك هێمایەك بۆ تاك و تەنیایی خوای گەورە، هەر دوای بڵاوکردنەوەی ئەو وێنەیە بە چەندین شێواز قسە بە یاریزانەکە گوترا و بە ئیسلامی توندڕەو وەسفیان کرد، بەڵام یاریزانەکە راستەوخۆ ئەمەی رەتکردووە.
رۆژنامەکە ئاماژەی بەوەشکردووە، دوای بڕیارەکەی رۆدیگێر راستەوخۆ ناگلیسمانی راهێنەری هەڵبژاردەی ئەڵمانیا پەیوەندی بە یاریزانەکەوە کردووە و لە بڕیارەکەی پاشگەزی کردووەتەوە.
راهێنەرەکەی ئەڵمانیا ئەوەی بە یاریزانە موسوڵمانەکە گوتووە، کە ئەو شتانە لەبیر بکات و تەنیا سەرنجی لەسەر ئامانجەکانی بێت لەگەڵ هەڵبژاردەی ئەڵمانیا، وەك هەڵوێستێك و دەرخستنی گرنگی یاریزانەکە بۆ هەڵبژاردەی مانشافت، رۆدیگێریان وەك یەکێك لە کاپتنەکانی هەڵبژاردەکە دیارییکرد.
ئانتۆنیۆ رۆدیگێر تەمەنی 31 ساڵە و پێشتر یاریی بۆ یانەکانی شتوتگارت، رۆما و چێڵسی کردووە و بەهای ئێستای لە بازاڕی گواستنەوەی یاریزانان 25 ملیۆن یۆرۆیە.
