بۆرییەكی نەوت تەقێندرایەوە
"بۆرییەكە چاككراوەتەوە و كاریگەری ئەوتۆی نابێت"
K24 - ھەولێر
شەوی رابردوو یەكێك لە بۆرییە نەوتەكانی كێڵگە بایی حەسەن لە كەركووك تەقێندرایەوە.
ئەحمەد عەسكەری سەرۆكی لیژنەی نەوت لە ئەنجوومەنی پارێزگای كەركووك بە كوردستان24 راگەیاند: "شەوی رابردوو یەكێك لە بۆرییەكانی كێڵگە نەوتی بایی حەسەن لە رێگەی بۆمبەوە تەقێندراوەتەوە".
گوتیشی: "تەقاندنەوەی بۆرییەكە كاریگەرییەكی ئەوتۆی نەبووە، چونكە ئەو جۆرە بۆریانە زۆر گەورەنین و دوای ماوەیەك بۆرییەكە چاككراوەتەوە".
بە گوتەی ھێزە ئەمنییەكانی كەركووك پێشتر داعش چەند كردەوەیەكی ھاوشێوەی لە سنوورەكە ئەنجامداوە، بەڵام تا ئێستا ھیچ لایەنێك بەرپرسیاریەتی خۆی لە تەقاندنەوەی ئەو بۆرییە نەوتە رانەگەیاندووە.