بەوێنە.. خۆزی مۆرینهۆ لە مەدرید دادگایی دەکرێت

K24- هەولێر

خۆزێ مۆرینهۆ بۆ ئامادەبوونی لە دادگە گەیشتە مەدرید.
سەرلەبەیانی ئەمڕۆ خۆزێ مۆرینهۆ، راهێنەری پێشووی ریال مەدریدی ئیسپانی و بەڕێوەبەری هونەری ئێستای مانچێستەر یونایتد بۆ ئامادەبوون لە بەردەم دادوەر گەیشتە دادگەی پۆزیلۆ لە مەدرید.
مۆرینهۆ بە خۆدزینەوەی لە باج دان تۆمەتبارە و داواکاری گشتی بە خۆدزینەوەی لە دانی 3,3 ملیۆن یۆرۆ لە ساڵانی 2011 و 2012 تۆمەتباری کردووە و ئەمڕۆ مۆرینهۆ لە بەردەم دادوەر گوتەی خۆی دەدات.
مۆرینهۆ ئامادە نەبوو هیچ لێدوانێک بۆ ئەو میدیایانە بدات کە لە بەردەم دادگە چاوەڕێی مۆرینهۆیان دەکرد و خۆزێ رۆژی یەکشەممە لە یاریی لوتکەی پرێمەرلیگ بەرامبەر چێڵسی، یانەی پێشووی خۆی یاریی دەکات.
جگە لە مۆرینهۆ پێشتر لیۆنێل مێسی و کریستیانۆ رۆناڵدۆش لەلایەن داواکاری گشتی ئیسپانیاوە بە خۆدزینەوە لە باجدان تۆمەتبارکران و مێسی و کریستیانۆش بۆ گوێگرتن لە گوتەکانیان لە دادگە ئامادەبوون.