به‌ فه‌رمی 3 یاریزان بۆ خه‌ڵاتی باشترین یاریزانی ئه‌فریكا به‌ربژێر كران

به‌ فه‌رمی فیدراسیۆنی تۆپی پێی ئه‌فریكا لیستی كۆتایی به‌ربژێره‌كانی بۆ وه‌رگرتنی خه‌ڵاتی باشترین یاریزانی 2017 راگه‌یاند كه‌ له‌ 3 یاریزان پێك دێن.

ئه‌مڕۆ دووشه‌ممه‌، 18دێسێمبه‌ری 2017، فیدراسیۆنی تۆپی پێی ئه‌فریكا به‌ فه‌رمی له‌سه‌ر پێگه‌ی خۆی 3 یاریزانی بۆ وه‌رگرتنی خه‌ڵاتی باشترین یاریزانی ساڵ به‌ربژێر كردووه‌ كه‌ پێكهاتوون له‌ (محه‌مه‌د سه‌ڵاح) هێرشبه‌ری میسری یانه‌ی لیڤه‌رپوول، سه‌یدۆ مانی یاریزانی سه‌نیگالی یانه‌ی لیڤه‌رپوول و ئۆبامیانگ هێرشبه‌ری گابۆنی یانه‌ی دۆرتمۆند.

فیدراسیۆنی تۆپی پێی ئه‌فریكا مانگی رابردوو 11 یاریزانی بۆ وه‌رگرتنی خه‌ڵاته‌كه‌ به‌ربژێر كرد، به‌ڵام ئه‌مڕۆ ژماره‌ی به‌ربژێره‌كانی بۆ 3 یاریزان كه‌م كرده‌وه‌، له‌ نێویاندا ناوی ریاز محه‌ره‌ز هێرشبه‌ری جه‌زائیری یانه‌ی لێسته‌ر سیتی نابیندرێت كه‌ ساڵی رابردوو به‌ باشترین یاریزانی 2016ـی كیشوه‌ری ئه‌فریكا ده‌ستنیشان كرا.