هازارد: هانده‌رێكی سه‌رسه‌ختی فره‌نسام
پێش یارییه‌كه‌ی سبه‌ی، هازارد ده‌ڵێت فره‌نسام له به‌لجیكا خۆشتر ده‌وێت
.jpg)
ئیدین هازارد كاپتنی هه‌ڵبژارده‌ی به‌لجیكا، سه‌ره‌ڕای ئه‌وه‌ی سبه‌ی هه‌ڵبژارده‌كه‌ی له قۆناخی پێشكۆتایی رووبه‌ڕووی فره‌نسا ده‌بێته‌وه، به‌ڵام جه‌خت له‌وه ده‌كاته‌وه كه پێشتر هانده‌رێكی سه‌رسه‌ختی فره‌نسا بووه، ده‌شڵێت: پێشتر من فره‌نسام له به‌لجیكا خۆشتر ویستووه.
ئه‌مڕۆ دووشه‌ممه، 9 ته‌مووزی 2018، له پرێس كۆنفرانسێك له باره‌ی یارییه‌كه‌ی سبه‌ی نێوان به‌لجیكا و فره‌نسا، ئیدین هازارد ده‌ڵێت: من له منداڵییه‌وه هانده‌رێكی شێتانه‌ی فره‌نسام.
هازارد كه پێشتر یانه‌ی لیلی فره‌نسا یاریكردووه، گوتیشی: كاتێك هه‌ڵبژارده‌ی فره‌نسا بووه پاڵه‌وانی مۆندیالی 1998 من و برایه‌كانم زۆر دڵخۆشبووین و خۆشترین رۆژمان تێپه‌ڕ كرد.
هازارد گوتیشی: سه‌ره‌ڕای ئه‌وه‌ی من فره‌نسام زۆر خۆشده‌وێت، به‌ڵام هه‌وڵده‌ده‌م له یارییه‌كه‌ی سبه‌ی شكست به‌و هه‌ڵبژارده‌یه بێنم و به‌لجیكا بۆ یاریی كۆتایی مۆندیال سه‌ربخه‌م.
بڕیاره سبه‌ی سێشه‌ممه، له كاتژمێر 9:00ـی شه‌و، هه‌ڵبژارده‌ی به‌لجیكا و فره‌نسا له یاری پێشكۆتایی مۆندیالی 2018 به‌یه‌ك بگه‌ن، براوه‌ی ئه‌و یارییه راسته‌وخۆ ده‌گاته یاریی كۆتایی مۆندیال.
