ئالۆنسۆ هاوشێوه‌ی كریستیانۆ دادگایی كرا

دوای ئامادەبوونی رۆناڵدۆ لە دادگا، ئەمجارەیان چابی ئالۆنسۆی یاریزانی پێشووی ریال مەدریدی هەر بە هەمان تۆمەتی دۆن لە دادگا ئامادە بوو.

ناوەڕاستکاری پێشووی یانەکانی ریال مەدرید و بایرن میونشنی ئەڵمانیا ساڵی رابردوو لەلایەن دادگای وڵاتەکەی بەوە تۆمەتبار کراوە پێش جێهێشتنی ریزەکانی ریال مەدرید  لە نێوان ساڵەکانی 2010  بۆ2012  خۆی لە دانی باج دزیوەتەوە و لەم ماوەیەدا بڕی 2.3 ملیۆن یۆرۆی وەکو باج بۆ خەزێنەی وڵاتەکەی نەگەڕاندۆتەوە، بۆیە ئەمیش بریاری دادگایی کردنی بۆ دەرچوو و بۆ ئەم مەبەستەش ئەمڕۆ گەیشتە دادگا و دادگایی کرا.

لە ئەگەری راستی ئەم تۆمەتانە ئەوا چاوەڕی دەکرێت ئالۆنسۆ سزای زیندانی بۆ ماوەی 5 ساڵی بۆ دەردەچێت لەگەڵ سزادانی به‌ پێبژاردن به‌ پاره‌.

دوای بەرێوەچوونی دادگاییەکە ئالۆنسۆ وەڵامی رۆژنامەنوسانی دایەوە و هەموو ئەم تۆمەتانەشی رەتکردەوە.

له‌مباره‌یه‌وه‌ ئالۆنسۆ گوتی: من دڵنیاتان دەکەمەوە کە هیچ کارێکی نایاساییم نەکردووە و هەر لە سەرەتاوە هاوکار بوومە لەگەڵ خەزێنەی وڵاتەکەم و هیچ شتێکم نەشاردۆتەوە و بە پێ یاسا مامەڵەم کردووە و هێچ کاتێکیش کاری نایاساییم نەکردووە، بۆیە ئەمڕۆ لێرە لە دادگا ئامادە بووم بۆ ئەوەی بەرگری لە مافەکانی خۆم بکەم و دەمەوێت کۆتایی بەم کەیسە بێنم.