لە سلێمانی 29 تۆمەتبار دەستگیر كران

K24 - سلێمانی

ھێزەكانی پۆلیس لە سلێمانی لە ماوەی 14 رۆژدا توانیویانە 29 تۆمەتبار دەستگیر بكەن، كە چەندین تۆمەتی جۆراوجۆریان ئەنجامداوە.

سەركەوت ئەحمەد، وتەبێژی پۆلیسی سلێمانی لە كۆنگرەیەكی رۆژنامەوانیدا رایگەیاند: "بەشی پۆلیسی نەهێشتنی تاوان، لەماوەی 14 رۆژدا 29 كەسیان دەستگیر كردووە، كە تاوانی جۆراوجۆریان ئەنجامداوە".

روونیكردەوە: "بەشێك لە تاوانبارەكان پارەیان دزیووە و ھەروەھا پارەی ساختەیان لە بازاڕەكان بڵاوكردووەتەوە. ھەروەھا ھەندێكیان مادەی ھۆشبەریان بەكارھێناوە و دەستدرێژیان كردووەتە سەر ژنان، ھاوكات چەند كەسێكیان تۆمەتبارن بە خراپ بەكارھێنانی ئامێرەكانی پەیوەندی".

وتەبێژی پۆلیسی سلێمانی، ئاماژەی بەوەكرد: "یەکێك لەو تۆمەتبارانە 2 ھەزار و 784 وێنەی ئافرەتانی لە مۆبایلەکەیدابووەو دەستکاری وێنەکانی کردوەو لە بەرامبەردا داوای پارەی کردووە".

ھێزەكانی پۆلیسی سلێمانی لەگەڵ دەستگیركردنی ئەو تۆمەتبارانە دەستیان گرتووە بەسەر 5 دەمانچە.

سەركەوت ئەحمەد ئاشكراشی كرد: "لە ماوەی 4 رۆژی رابردوودا سێ  حاڵەتی کوشتن لەناو شاری سلێمانی تۆماركراوە".

ھ.م