هەفتەیەكی مێژوویی چاوەڕێی عێراق دەكات

بۆ یەكەمجار لە مێژوودا، 3 یانەی عێراق لە 3 رۆژ بەشداریی لە 3 پاڵەوانێتی نێودەوڵەتی دەكەن، یانەی دهۆك بۆ یەكەمجار وەكو یەكەمین یانەی كوردستانی بەشداریی لە جامی یانەكانی كەنداوی عەرەبی دەكات.

شورتە لەبەردەم یارییەكی چارەنووسسازدا
ئەمڕۆ دووشەممە، لە یاریگەی كەربەلا لە كاتژمێر 07:00ـی ئێوارە لە گەڕی سێیەمی خولی یانە پاڵەوانەكانی ئاسیا لە كۆمەڵەی رۆژهەڵات، یانەی شورتەی عێراقی میوانداریی باختاكوری ئۆزبەكیستانی دەكات.
یانەی شورتە لە دوایین دوو یاریی لە چامپیۆنزلیگی ئاسیا بەرامبەر یانەكانی نەسر و هیلالی سعوودیە تەنیا یەك خاڵی بەدەستهێناوە، لەنێو 12 یانەی كۆمەڵەكەی لە ریزبەندی یازدەیەم دێت، لە بەرامبەردا یانەی باختاكور بە هەمان شێوە تەنیا یەك خاڵی بەدەستهێناوە و بە جیاوازی گۆڵ لە پلەی هەشتەم دێت.

دهۆك بۆ یارییە مێژووییەكەی ئامادەیە
یانەی دهۆك وەكو نوێنەری عێراق بۆ یەكەمجار لە مێژوودا لە نێو یاریگە و بەردەم هاندەرانی یەكەمین یاریی لە جامی یانەكانی كەنداوی عەرەبی ئەنجام دەدات.
 سبەی سێیەممە، لە كاتژمێر 08:00ـی شەو یانەی دهۆك لە نێو یاریگەی خۆی میوانداریی یانەی ئەهلی سەنعای یەمەنی دەكات.
یانەی دهۆك دەرفەتێكی زێڕینی لەبەردەمە بۆ ئەوەی سوود لە دۆخی خراپی یانە یەمەنییە وەربگرێت بەوپێیەی ئەو یانەیە لە 2024 تەنیا چوار یاریی كردووە و خولی وڵاتەكە هێشتا دەستی پێ نەكردووەتەوە، بەشێك لە یاریزانەكانیش بۆ یەكەمجار لە یارییەك بەیەكەوە یاریی دەكەن.
یانەی دهۆك لە كۆمەڵەی خۆی هاوشانی یانەكانی نەسری ئیماراتی، زەفاری عوممانی و ئەهلی سەنعای یەمەنی یاریی دەكات.

قوە جەوییە لوتكەی ئاسیای گرتووە
لە گەڕی سێیەمی خولی یانە پاڵەوانەكانی ئاسیا بۆ ئاستی دووەم، چوارشەممەی داهاتوو یانەی قوە جەوییە لە یاریگەی مەدینە لە بەغدا لە كاتژمێر 09:00ـی شەو میوانداریی یانەی خالدییەی بەحرێنی دەكات.
قوە جەوییە كەوتووەتە كۆمەڵەی دووەم و دوو یاریی كردووە هەر دوو یارییەكەشی بە هەمان ئەنجام 2 ـ 1 بردووەتەوە و لوتكەی كۆمەڵەكەی گرتووە، جەوییە هاوشانی یانەكانی تەعاونی سعوودیە، ئاڵتن ئاسیری توركمانستان و خالدییەی بەحرێنی یاریی دەكات.