لوبنان: تا ئێستا 164 کەس لە کارمەندانی فریاگوزاریی بە هێرشەکانی ئیسرائیل کوژراون

ئاژانسی هەواڵی لوبنان بڵاوی کردەوە، ژمارەی کوژراوانی ڕیزی تیمەکانی فریاگوزاریی بەهۆی هێرشەکانی ئیسرائیل بۆ سەر لوبنان گەیشتە 164 کەس، 275 دیکەشیان برینداربوون.

ناوەندی جموجۆڵە خێراکانی تەندروستی سەر بە وەزارەتی تەندروستی لوبنان بڵاوی کردەوە، بەهۆی هێرشێکی ئیسرائیل بۆ سەر ناوەندی تەندروستی لە بازوریە، کارمەندیكی فریاگوزاریی لە سێکتەری تەندروستی بەرگریی شارستانی کوژرا و 5ـی دیکەش برینداربوون کە سێیان لە هەمان سێکتەردان.

وەک ناوەندەکە ئاشکرای کردووە، کۆی گشتی ئەو فریاگوزارانەی لە سەرەتای دەستپێکردنی هێرشەکانی ئیسرائیل بۆ سەر لوبنان کوژراون، گەیشتووەتە 164 کەس و ژمارەی بریندارەکانیش بەرزبووەتەوە بۆ 275.

هەینی 25ـی تشرینی یەکەمی 2024، ئاژانسی هەواڵی لوبنان بڵاوی کردەوە، سوپای ئیسرائیل زنجیرەیەک هێرشی بۆ سەر ناوچە جیاجیاکانی لوبنان دەست پێکرد  و کوژراو و برینداری لێکەوتەوە، هەروەها لە قەزای حاسبییەی باشووی وڵاتەکە 3 ڕۆژنامەنووس کوژران و ژمارەیەکی دیکە بریندار بوون، 4 باڵەخانەش خاپوور کران.

وەزارەتی تەندروستی لوبنان ڕایگەیاند: لەوەتەی دەستپێکردنی جەنگی ئیسرائیل بۆ سەر لوبنان، تا ئێستا 2653 هاووڵاتی لوبنانی کوژراون و 12360 کەسی دیکەشیان برینداربوون.