ئەمجەد عەتوان خەڵاتە تایبەتەكەی كوردستان24ـی پێبەخشرا

ئەمجەد عەتوان ناوەراستكاری یانەی زاخۆ خەڵاتە تایبەتەكەی كوردستان24ـی بردەوە و بە باشترین یاریزانی گەڕی سێیەمی خولی ئەستێرەكانی عێراق دیاریكرا.
دێسكی وەرزشی كوردستان24 بە راوێژ لەگەڵ لێژنەیەكی تایبەت كە لە یاریزانان و راهێنەر پێكهاتووە هەفتانە باشترین یاریزانی خولی ئەستێرەكانی عێراق خەڵات دەكات.
ئەمجەد عەتوان ئەستێرەی یانەی زاخۆ لە گەڕی سێیەمی خولی ئەستێرەكانی عێراق سەركردایەتی بردنەوەی یانەكەی بەرامبەر كەربەلا كرد و بە ئەنجامێكی گەورە (5 ـ 0) یارییەكەیان بردەوە، ئەمە یەكەمین سەركەوتنی یانەكە بوو لەم وەرزە، لەو یارییەدا ئەمجەد عەتوان دوو گۆڵی تۆمار كرد و بە پیاوی یارییەكەش دیاریكرا، بەمەش یاریزانەكەی هەڵبژاردەی عێراق لە لایەن دێسكی وەرزشی كوردستان24 بە باشترین یاریزانی هەفتە دیاریكرا و خەڵاتە تایبەتەكەی كوردستان24ـی پێبەخشرا.