ئەحمەد سەبری خەڵاتە تایبەتەكەی كوردستان24ـی پێبەخشرا
ئەحمەد سەبری یاریزانی كوردی یانەی نەفتی شاری بەغدا تاكە یاریزانە لەم وەرزە توانیویەتی لە كۆی 5 یاری لە 3 یاریی بە پیاوی یارییەكان دەستنیشان بكرێت
ئەحمەد سەبری ناوەراستكاری هێرشبەری یانەی نەفتی بەغدا پێش یارییەكەی ئەمڕۆیان بەرامبەر شورتە خەڵاتە تایبەتەكەی كوردستان24ـی پێبەخشرا و وەكو باشترین یاریزانی گەڕی چوارەمی خولی ئەستێرەكانی عێراق دیاریكرا.
دێسكی وەرزشی كوردستان24 بە راوێژ لەگەڵ لێژنەیەكی تایبەت كە لە یاریزانان و راهێنەر پێكهاتووە هەفتانە باشترین یاریزانی خولی ئەستێرەكانی عێراق خەڵات دەكات.
ئەحمەد سەبری یاریزانی كوردی شاری سێمێل، لە گەڕی چوارەمی خولی ئەستێرەكانی عێراق گۆڵێكی تۆمار كرد و بە پیاوی یارییەكەش دیاریكرا.
ئەم ئەستێرە كوردە ئەم وەرزە لە خولی ئەستێرەكانی عێراق لە كۆی 5 یاری، 3 گۆڵی كردووە، تاكە یاریزانیشە لەسەر ئاستی خولەكە لە كۆی 5 یاری لە 3 یاریی بە پیاوی یارییەكە دیاریكراوە.
