وەزارەتی کشتوکاڵ باج و قەدەغەی هاوردەکردنی لەسەر تەماتە هەڵگرت
بێگەرد تاڵەبانی، وەزیری کشتوکاڵ و سەرچاوەکانی ئاوی حکوومەتی هەرێمی کوردستان ڕایدەگەیەنێت "پاڵپشت بە بڕیاری سەرۆکایەتیی ئەنجوومەنی وەزیران، بڕیارێکیان دەرکردووە بە هەڵگرتنی باج و قەدەغەی هاوردەکردنی بەرهەمی تەماتە لە دەرەوەی هەرێمی کوردستان."
چوارشەممە 6ـی تشرینی دووەمی 2024، بێگەرد تاڵەبانی، وەزیری کشتوکاڵ و سەرچاوەکانی ئاوی حکوومەتی هەرێمی کوردستان بڵاوی کردووەتەوە "لە پێناو بەرژەوەندیی گشتی، بڕیار درا بە هەڵگرتنی باج و قەدەغەی هاوردەکردنی بەرهەمی تەماتە لە دەرەوەی هەرێمی کوردستان."
وەزیری کشتوکاڵ دەڵێت: "دوای بەدواداچوونمان بۆ بەرهەمی تەماتە لە تەواوی سنووری بەڕێوەبەرایەتیی گشتیی کشتوکاڵی پارێزگاکان و ئیدارە سەربەخۆکانی هەرێمی کوردستان، بۆمان دەرکەوت کە ئەم بەرهەمە لە بازاڕەکانی هەرێم کەم بوەتەوە و بەشی پێویستی هاووڵاتیان ناکات، لە هەمان کاتدا نرخی بەرزبوەتەوە ، بۆیە لەپێناو بەرژەوەندیی گشتی و پاڵپشت بە یاسای پاراستن و پێشخستنی بەرووبوومی کشتوکاڵی و پاڵپشت بە بڕیاری سەرۆکایەتیی ئەنجوومەنی وەزیران تایبەت بە پاراستنی بەرهەمی خۆماڵی، بڕیارمان دا بە هەڵگرتنی باج و قەدەغە لەسەر هاوردەکردنی بەرهەمی تەماتە لە دەرەوەی وولات ،بۆ ئەم مەبەستە سەرجەم لایەنە فەرمیەکانمان ئاگادار کردوەتەوە بۆ وەرگرتنی ڕێکاری پێویستی کارگێڕی و یاسایی."