ڤیدیۆ.. زاخۆ یاریی لوتکەی لە هەولێر بردەوە

لە گەڕی حەوتەمی خولی ئەستێرەکانی عێراق، زاخۆ میوانداریی هەولێری کرد و یارییەکەی بە ئەنجامی (3-1) بردەوە.

دوای تێپەڕینی 26 خولەک بەسەر یارییەکە، ناسڕ ئەحمەد گۆڵی یەکەمی زاخۆی بەرامبەر هەولێر تۆمار کرد.

یارییەکە گەیشتە خولەکی 43، ناسڕ ئەحمەد گەڕایەوە و گۆڵی دووەمی خۆی و زاخۆی لە یارییەکە تۆمار کرد.

گەرچی هەولێر لە خولەکی 89 جیاوازییەکەی بۆ گۆڵێک کەم کردەوە و هێلیۆ مۆنتێرۆ گۆڵی یەکەمی هەولێری کرد، بەڵام ئەمجەد عەتوان لە دوا ساتەکان هەولێری بە تەواوی بێ هیوا کرد و گۆڵی سێیەمی زاخۆی کرد.

زاخۆ بەم سەرکەوتنەی خاڵەکانی لە خانەی حەوتەمی ریزبەندی بۆ 12 خاڵ بەرز کردەوە، هەولێریش دووەمین یاریی ئەم وەرزەی دۆڕاند و بە 11 خاڵ لە خانەی نۆیەم دەبینرێت.

دوای تەواوبوونی یارییەکە، سەمیر بابۆ راهێنەری یانەی هەولێر تایبەت بۆ کوردستان24 لێدوانی دا و رەخنەی ئاراستەی ناوبژیوانی یارییەکە کرد و دەڵێت:"بەرامبەر 13 یاریزان یارییمان کرد"

لەلایەکی دیکە شڤان جەمیل یاریزانی زاخۆ ئاشکرای کرد بەڵێنیان بە هاندەرانی زاخۆ دابوو کە یارییەکە لە هەولێر دەبەنەوە

دوای یارییەکەش هاندەرانی هەولێر کاردانەوەیان هەبوو، قسەی خۆیان لەسەر یارییەکە و ئەنجامی یارییەکە کرد

کورتکراوەی یارییەکەی زاخۆ و هەولێر بە کۆمێنتاری هەرێم قەرەناوی