نرخی قاوە بۆ بەرزترین ئاستی 50 ساڵی ڕابردوو بەرز بووەوە

گۆڕانکارییەکانی کەشوهەوا کاریگەری خستووەتە سەر بەرهەمە کشتوکاڵییەکان، لە ژێر ئەو کاریگەرییە نرخی قاوەی عەرەبیکا لە بازاڕەکانی جیهان بۆ هەر پاوەندێک کە بەرانبەرە بە 453.6 گرام بۆ بەرزترین ئاستی لە دوای ساڵی 1972 بەرز بووەوە.

لە دوایین مامەڵەی بازاڕە داراییەکانی ئەمەریکا، نرخی هەر پاوەندێک لە قاوەی عەرەبیکا گەیشتە سەرووی 3.20 دۆلار، ئەمەش بەهۆی کەمبوونەوەی بەرهەمهێنان لە بەرازیل و ڤێتنام کە سەرەکیترین بەرهەمهێنەرانی قاوەن لە جیهاندا.

قاوەی عەرەبیکا یەکێکە لەو جۆرە قاوانەی کە زۆرەترین خواستی لەسەرە و بووەتە پێوەرێکی سەرەکی بۆ نرخی قاوە لە جیهان، بەڵام وشکەساڵی وای کردووە بەرهەمهێنانی کەم بێتەوە، بە جۆرێک بەرهەمهێنانی قاوە لە بەرازیل ئەمساڵ 26% کەم بووەتەوە.