چاودێرانی سیاسی: یەکێتی فەرمانبەرانی سلێمانی بۆ مەرامی کەسی خۆی بەکار دەهێنێت
سەربارى ئەوەى هەموو لایەک لە پێش هەموویانەوە حکوومەتى هەرێمى کوردستان مووچە بە مافێکى ڕەواى مووچەخۆران دەزانێت و هەموو هەوڵێکیشی لەبەغدا داوە بۆ دەستەبەر کردنى ئەو مافە، بەڵام بەغدا هەرجارە و بە بیانوویەک ئەو مافەى خەڵک نادات، لەم نێوەندەدا بەشێک لە مامۆستایان و فەرمانبەرانى سلێمانى هاتنە سەرشەقام چاودێرانى سیاسى بۆچوونیان وایە کە یەکێتی، زانیارى هەڵە بە فەرمانبەران دەدات و دەیەوێت بە بانگەشەکردن بۆ بەدەستهێنانى مافەکانى ئەوان دەستکەوتى سیاسی بۆ خۆى بەدەست بهێنێت.
ماف لە بەغدایە و داواکارى جارێکى دیکە لە سلێمانیە و ڕوو لە حکوومەتى هەرێمە، مامۆستا و فەرمانبەران داواى مووچەکانیان دەکەن، وەک مافێکى ئاسایی، بەڵام ئێستا ئەو مافە لاى بەغدایە و بڕیارى دادگەى فیدرڵیش لەو بارەوە هەیە، بەڵام بەغدا پابەندى هیچ بڕیار و یاسایەک نابێت، بەشێک لەم خۆپیشاندەرانە لە ڕابردوودا و بە ئێستاشەوە لە لایەن حزبێکی سیاسیەوە ئاراستە دەکرێن، بە جۆرێک کەى حزب بییەوێت دێنە سەرشەقام و کەى حزب بییەوێ کۆتایى پێ دەهێنن.
سامان فارس، شرۆڤەکارى سیاسی، بە کوردستان24ـی ڕاگەیاند: "من نازانم یەکێتی پەیوەندییەکی توند و تۆڵی هەیە بەقسەی خۆیان لەگەڵ لایەنە شیعەکان کە نزیکە لەخۆیانەوە، نازانم ئەو هاوپەیمانێتییەی بۆ کەی هەڵگرتووە بۆ نموونە حەسەن پلایس و قەیس خەزعەلی و ڕەیان کلدانی ئەگەر لەبری ئەوەی خەڵک دەهێنێتە سەر شەقام مامۆستایان و فەرمانبەران کە مافێکی ڕەوای خۆیانە داوای مووچەی خۆیان بکەن، ئەی بۆ ناچی لەگەڵ هاوپەیمانانە کە تۆ بەشێوەیەکی وا هاوپەیمانی و کردووە کە ئێستاش ناتوانی ڕەئێکی گەلی کورد بە ئەوان بڵێی ئێ بچۆ لەگەڵ ئەوان دانیشە زەخت بکە".
ئەو حزبەى دژى حکوومەتى هەرێمە، خۆى بەشدارێکى سەرەکى حکوومەتە و پۆستى باڵاى هەیە و ئاگادارى سەرجەم وردەکارى کێشەکانە و پۆستى باڵاى لە بەغداش هەیە.
لای خۆیەوە شەنکار عەبدوڵڵا، چاودێرى سیاسی بە کوردستان24ـی گوت: "من پێم وایە داواکاری مامۆستایان یان مووچەخۆران بۆ مووچە داواکارییەکی ڕەوایە، مافێکی ڕەوایە مووچە بدرێت بە هەموو چینێک لە بەرانبەر ئەو ئەرکەی کە هەیەتی، بەڵام قۆستنەوە و بەلاڕێدابردن و هەتا سواربوونی شەپۆلی ناڕەزایەتی خەڵک لەلایەن لایەنە سیاسییەکانەوە شتێکی تازە نییە، ئەو حزبەی هانی مامۆستا و فەرمانبەر دەدات خۆپیشاندان بکات، دەستێکی باڵای هەیە لە ماوەی 60 ساڵی ڕابردوو لەو کارەساتانەی بەسەر ئەم میللەتدا هاتووە".
هەموو کات حکوومەتی هەرێمی کوردستان، ئەوەی نەشاردووەتەوە کە مووچە مافێکی یاسایی و سرووشتی فەرمانبەرانە، بەڵام وەک چاودێرانی سیاسی دەڵێن: ناکرێت کە لایەنێک خۆی بەشدارێکی سەرەکی حکوومەتە و سەرجەم وردەکارییەکانی لایە داواکاری مامۆستایان و فەرمانبەران و داخستنی دەرگای قوتابخانەکان بۆ مەرام و بەرژەوەندییەکانی خۆی بەکار بهێنێت.