گواردیۆلا رەتیدەکاتەوە شکستەکانی مانچێستەر سیتی پەیوەندی بە یەك یاریزانەوە هەبێت
پێپ گواردیۆلای راهێنەری مانچێستەر سیتی رەتیدەکاتەوە هۆکاری شکستە یەك لە دوای یەکەکانی یانەکەی تەنیا یەك یاریزان بێت و هەمووان بە بەرپرس دەزانێت.
راهێنەرە ئیسپانییەکە بەرگری لە هێرشبەری یانەکەی دەکات و دەڵێت: کێشەی گۆڵ تۆمار نەکردن تەنیا پەیوەندی بە هالاندەوە نییە بەڵکو تەواوی یانەکە تێیدا بەشدارن.
گواردیۆلا لە کۆنگرەیەکی ڕۆژنامەوانیدا پێش رووبەڕووبوونەوەی ئیڤەرتن گوتی: بابەتەکە پەیوەندی بە ئێمەوە هەیە نەك تەنیا یەك یاریزان.
پێپ ئاماژەی بەوەشکرد: لە رابردوو کاتێك هالاند گۆڵی تۆمار دەکرد، هۆکارەکەی تەنیا ئەو نەبوو بەڵکو تەواوی یاریزانانی هاوڕێی و یانەکە هاوکاری بوون.
راهێنەری مانچێستەر سیتی لە درێژەی قسەکانی ئەوەشی گوت: کاتێک کێشەت لە هێڵی بەرگری و ناوەڕاست دەبێت ئەوە پەیوەندی بە یانەکەوە هەیە نەك تەنیا هێرشبەرێك، چونکە هالاند بۆ ئێمە زۆر گرنگە، پێویستە زۆرترین سوود لە بەهرەکەی وەربگرین.
لە کۆتایی قسەکانیدا پێپ ئەوەی خستەڕوو کە: یاریزانەکان لە هەموو کات زیاتر هەوڵی بردنەوە دەدەن و بۆ یانەکە دەجەنگن بەڵام لە دەرەوە وا هەست دەکەن کێشە لە راهێنەر و یاریزانە بەڵام بەو شێوەیە نییە.
مانچێستەر سیتی بە دۆخێکی خراپدا تێپەڕدەبێت و لە کۆتا 12 یاریی 9 یاریی دۆڕاندووە، لە دوای ئەنجامدانی 17 یاریی لە پرێمەرلیگ خاوەنی 27 خاڵە و لە ریزبەندی حەوتەم دێت.
