بە فەرمی شێروانە بووە پاڵەوانی قۆناغی یەكەم
شێروانە لە دوایین یاریی قۆناغی یەكەم گۆڵبارانی پیشەسازی كرد

یانەی شێروانە نۆیەمین سەركەوتنی لەم وەرزە تۆمار كرد و بووە پاڵەوانی قۆناغی یەكەمی خولی نایابی كوردستان، یانە كەلارییەكە بووە یەكەمین یانەش لە قۆناغی یەكەم زۆرترین سەركەوتن و زۆرترین گۆڵ تۆمار بكات.
یانەی شێروانە بە راهێنەرایەتی عادل عەلی ئەم وەرزە بە ئاستێكی بەرز و جێگیر دەردەكەوێت، لە دوایین یاریی قۆناغی یەكەمی خولی نایابی كوردستان گۆڵبارانی پیشەسازی كرد و بە ئەنجامی 4 گۆڵ بەرامبەر گۆڵێك سەركەوتنی تۆمار كرد و بەمەش ژمارەی خاڵەكانی لە پێشەنگی خولی نایابی كوردستان گەیاندە 30 خاڵ و بە جیاوازی 5 خاڵ لە نزیكترین ركابەری كە یانەی رزگارییە دوورە.
شێروانە لە كۆی 14 یاریی ئەم وەرزە، 9 بردنەوە، 3 بەرامبەربوون و 2 دۆڕانی هەیە، هێرشبەرانی یانە كەلارییەكە 26 گۆڵیان تۆمار كردووە و هیچ یانەیەك زیاتر لە شێروانە لەم وەرزە گۆڵی نەكردووە.


