گۆستاڤۆ بۆ دووەمجار خەڵاتە تایبەتەكەی كوردستان24ـی بەدەستهێنا

گۆستاڤۆ هێنریك هێرشبەری بەرازیلی دوای هاتریكەكەی یاریی رابردوو بووە دووەمین یاریزانی یانەی زاخۆ لەم وەرزە خەڵاتە تایبەت و ناوازەكەی كوردستان24 بباتەوە.
كوردستان24 هەفتانە باشترین یاریزانی یانە كوردستانییەكانی خولی ئەستێرەكانی عێراق دەستنیشان دەكات، خەڵاتەكە هەموو ئەو یاریزانە كوردانەش دەگرێتەوە كە لە یانەكانی خوار و ناوەراستی عێراق یاریی دەكەن.
گۆستاڤۆ هێنریك هێرشبەری یانەی زاخۆ لە گەڕی نۆزدەیەمی خولی ئەستێرەكانی عێراق بەرامبەر قاسم هاتریكی كرد و سەركردایەتی سەركەوتنێكی گەورەی یانەكەی كرد كە تێیدا زاخۆی دەلال نیودەرزەن گۆڵی لە یانەی قاسم كرد.

گۆستاڤۆ هێنریك لە لایەن دێسكی وەرزشی كوردستان24 بەرزترین نمرە لە هەڵسەنگاندنەكان بەدەستهێنا و بە ئەستێرەی هەفتەی گەڕی نۆزدەیەمی خولی ئەستێرەكانی عێراق دیاریكرا.گۆستاڤۆ ئەم وەرزە بە تۆماركردنی 14 گۆڵ لوتكەی گۆڵكارانی خولی ئەستێرەكانی عێراقی گرتووە و بە جیاوازی گۆڵێك پێش موهەنەد عەلی هێرشبەری شورتە كەوتەوە.
یانەی زاخۆ تاكە یانەیە لەم وەرزە چوارجار خەڵاتە تایبەتەكەی كوردستان24ـی بەدەستهێناوە، گۆستاڤۆ دووجار و ئەمجەد عەتوان و ناسر محەمەدۆ هەریەكەی جارێكیان خەڵاتەكەیان بردووەتەوە.