کەمال محەممەد: دوای جەژن دەست بە دانوستانەکان لەبارەی هەناردەكردنەوەی نەوت دەکەینەوە
وەزیری سامانە سروشتییەکانی هەرێمی کورستان (بە وەکالەت)، ڕایگەیاند: دوای جەژنی قوربان، لەگەڵ وەزارەتی نەوتی فیدراڵ و کۆمپانیا نەوتییەکان، دانوستان لەبارەی هەناردەکردنەوەی نەوت دەکەین.
یەکشەممە 1ـی حوزەیرانی 2025، کەمال محەممەد ساڵح، وەزیری سامانە سروشتییەکانی حكوومەتی هەرێمی كوردستان (بە وەکالەت) تایبەت بە كوردستان24ـی گوت: گفتوگۆكان لەگەڵ بەغدا لەبارەی هەناردەكردنەوەی نەوتی هەرێمی كوردستان بەردەوامن.
وەزیری سامانە سروشتییەكان هەروەها دەشڵێت: دوای جەژنی قوربان، لەگەڵ وەزارەتی نەوتی عێراق و کۆمپانیا نەوتییەکان، دانوستاندن لەبارەی هەناردەكردنەوەی نەوتی کوردستان دەست پێ دەكەینەوە.
لەبارەی سەردانەکەی شاندی حکوومەتی هەرێم بۆ ئەمەریکا و هەڵوێستی وڵاتەکە لەبارەی هەرێمی کوردستان، کەمال محەممەد ساڵح، گوتی: بەرپرسانی ئەمەریکا بە ڕوونی بە ئێمەی ڕاگەیاندووە، کە پەیوەندییەکانیان لەگەڵ عێراق بەندە بە ڕێزگرتن لە قەوارەی سیاسیی هەرێمی کوردستان.
