سەرۆك و دەستەی نوێی كارگێری یانەی هەولێر جێگیر كران
سەفین یاسین بووە سەرۆكی یانەی هەولێر
ئومێد خۆشناو، پارێزگاری هەولێر ناسنامەی سەرۆكی داهاتووی یانەی هەولێری ئاشكرا كرد و ئەندامێكی دیكەیان بۆ دەستەی كارگێری یانەی هەولێر زیاد كرد و رایگەیاند بە پاڵپشتی حكوومەتی هەرێمی كوردستان هەولێر دەگەڕێنینەوە لوتكە.
ئەمڕۆ شەممە، 2 ئابی 2025، لە كۆنگرەیەكی رۆژنامەوانی ئومێد خۆشناو پارێزگاری هەولێر رایگەیاند پارێزەر سەفین یاسین دەبێتە سەرۆكی یانەی هەولێر و لەگەڵ ئەو ستافە كار دەكەن بۆ ئەوەی ئەنجامەكانی یانەی هەولێر باشتر بكەن.
ئومێد خۆشناو گوتیشی: هەر كەسێك گرفتێك بۆ یانەی هەولێر دروست بكات لەڕووی یاسایی و ئیدارییەوە رووبەڕووی دەبینەوە، دەبێت لە داهاتوو بە یەكدەستی و یەكگرتوویی یانەكە بەرەو باشتر ببەین و كەسێكیش وەكو وتەبێژێك دادەنێین تەنیا ئەو بۆی هەیە قسە بكات.
ئومێد خۆشناو دەشڵێت: لە ئەمڕۆوە دەرگای یانەی هەولێر دەكرێتەوە و دەستەیەكی هونەری بۆ ئامادەكردنی تیپ و كڕینی یاریزانان پێك دێت و لێژنەیەكیش بۆ ئەو قەرزانەی یانەی هەولێر دروست دەكرێت.
لە لایەكی دیكەیشەوە، سەفین یاسین سەرۆكی نوێی یانەی هەولێر رایگەیاند دڵخۆشە بە وەرگرتنی ئەو ئەركە، گوتیشی: ئەگەر پشتگیرمان بكەن دەتوانین بەیەكەوە لەگەڵ ئەم ستافە یانەكە بەرەو باشتر ببەین.
بە گوێرەی زانیارییەكانی كوردستان24، ئەمڕۆ یەكەمین كۆبوونەوەی دەستەی كارگێری نوێی یانەی هەولێر دەكرێت و هیشام بەكر بۆ دەستەكە زیاد كرا كە یەكێك بوو لە بەربژێرەكان و دەنگی پێویستی بەدەستنەهێنا بۆ ئەوەی لە قۆناغی یەكەم وەكو ئەندام دەستەی كارگێری یانەی هەولێر هەڵبژێردرێت.
