سەرۆك بارزانی و كونسوڵی نوێی ژاپۆن، جەختیان لە پەرەپێدانی پەیوەندییەكانی نێوان هەردوولا کردەوە
ڕۆژی یەکشەممە 3ـی ئابی 2025، سەرۆك مەسعود بارزانی لە سەلاحەددین پێشوازی لە هیتۆشی ئیشیزوکا كونسوڵی گشتیی نوێی ژاپۆن لە هەولێر كرد.
لە دیدارەکەدا سەرۆک بارزانی پیرۆزبایی لە کونسوڵی گشتی نوێی ژاپۆن کرد لە ئەرکە نوێکەیدا و هیوای سەرکەوتنی بۆ خواست، سەرۆک بارزانی ئاماژەی بەوەدا، کە شارستانیەتی گەلی ژاپۆن خزمەتێکی گەورەیان بە کۆی مرۆڤایەتی گەیاندووە و لەم ڕووەدا ڕۆڵی بەرچاویان هەبووە و ئامادەیی و پاڵپشتی خۆی و دامەزراوەکانی حکوومەتی هەرێمی کوردستانی بۆ باشترکردنی پەیوەندییەکانی هەرێمی کوردستان لەگەڵ ژاپۆن نیشاندا.
لای خۆییەوە کونسوڵی گشتیی نوێی ژاپۆن خۆشحاڵیی خۆی دەربڕی کە وەک کونسوڵی نوێی ژاپۆن لە هەرێمی کوردستان دەستبەکار دەبێت و جەختی کردەوە کە حکوومەت و گەلی ژاپۆن بەردەوام دەبن لە پشتیوانیکردن و بایەخدان بە پەیوەندییەکانی نێوان هەرێمی کوردستان و ژاپۆن.
هەر لە دیدارەكەدا بیروڕا لەبارەی بارودۆخی سیاسی و دوایین گۆڕانكارییەكان لەسەر ئاستی ناوچەكە و عێراق ئاڵوگۆڕ كرا و جەخت لە پەرەپێدانی پەیوەندییەكانی نێوان هەرێمی کوردستان و ژاپۆن كرایەوە.
