ڕۆژئاوای کوردستان.. ناکۆکییە سیاسییەکان کاریگەرییان کردووەتە سەر کەرتی پەروەردە
خەڵکی ڕۆژئاوای کوردستان بە نیگەرانی و دڵەڕاوکێیەکی زۆرەوە پێشوازییان لە ئەنجامەکانی تاقیکردنەوە گشتییەکان کرد.
ڕێژەی سەرکەوتن لە پۆلی نۆیەمدا گەیشتە 49%، کە ئەمە نزمترین ڕێژەی سەرکەوتن بووە لە ماوەی دە ساڵی ڕابردوودا لە سووریا. ئەم داتایە دڵەڕاوکێی گەورەی بۆ خێزان و قوتابییان دروست کردووە سەبارەت بە داهاتووی خوێندنی منداڵەکانیان.
لە بەرامبەردا، ئەنجامەکانی بەکالۆریۆس کەمێک باشتر بوو بە ڕێژەی 75%، بەڵام سەرەڕای ئەم ڕێژەیە، ژمارەی ئەو قوتابییانەی نمرەی زۆر بەرز (سەرووی 90%)ـیان بەدەستهێنابوو، بە شێوەیەکی بەرچاو کەمتر بوو لە ساڵانی پێشوو. ئەمەش نیشانەیەکە لەسەر خراپبوونی ئاستی ئەکادیمی و کەمبوونەوەی توانای کێبڕکێی قوتابییانی ناوچەکە لە ئاستی نیشتمانیدا.
یەکێک لە قوتابییە سەرکەوتووە یەکەمینەکانی ڕۆژئاوای کوردستان، کە توانیویەتی نمرەی 99% بەدەستبهێنێت، لە چاوپێکەوتنێکدا لەگەڵ کوردستان24، باسی لەو زەحمەتییە زۆرانە کرد کە لەم ساڵی خوێندنەدا ڕووبەڕووی بووەتەوە. ئەو ئاماژەی بەوەدا کە شێوازی پێشکەشکردنی تاقیکردنەوەکان و گۆڕانکارییە بەردەوامەکان بەهۆی ناکۆکییەکانی نێوان حکوومەتی دیمەشق و بەڕێوەبەرایەتی خۆسەر، بووەتە هۆی دروستبوونی دڵەڕاوکێ و فشاری زۆر لەسەر قوتابییان. زۆرجار قوتابییان ناچار بوون بۆ تاقیکردنەوەکان گەشت بکەن بۆ ناوچە جیاوازەکان، ئەمەش بارگرانییەکی زۆری دارایی و دەروونی لەسەر خێزانەکان دروست کردبوو.
لەلایەکی دیکەوە، مامۆستایانیش وەک قوتابییان، ئەو زەحمەتییانە ناشارنەوە کە ڕووبەڕوویان بوونەتەوە. ئەوان دەڵێن کە "زەحمەتییەکان زیاتر بوون" و سەرەڕای ئەوەی ڕێژەی سەرکەوتن لە بەکالۆریۆسدا باش بوو، بەڵام ژمارەی ئەو قوتابییانەی کە نمرەی زۆر بەرز و پێویستییان بۆ چوونە زانکۆ بەدەستهێناوە، بە بەراورد بە ساڵانی پێشوو زۆر کەمتر بوو. مامۆستایان لەژێر فشاری جیاوازی پڕۆگرامی خوێندن و نەبوونی متمانە بە بڕوانامەکان کاریان کردووە، ئەمەش کاریگەری نەرێنی لەسەر کوالێتی خوێندن دروست کردووە.
دوای ڕووخانی ڕژێمی سووریا و سەرهەڵدانی ناکۆکییەکانی نێوان دەسەڵاتی دیمەشق و بەڕێوەبەرایەتی خۆسەر لە ڕۆژئاوای کوردستان، قوتابییانی ناوچەکە بە شێوەیەکی بەرفراوان بێبەش بوون لە خوێندنی فەرمی کە لەلایەن حکومەتی ناوەندییەوە دانی پێدانرابێت. بەڕێوەبەرایەتی خۆسەر پڕۆگرامی خوێندنی تایبەت بەخۆی سەپاندووە، کە تا ئێستا لەسەر ئاستی نیشتمانی و نێودەوڵەتی دانپێدانراو نییە. ئەمەش کاریگەرییەکی نەرێنی و گەورەی لەسەر قوتابییان دروست کردووە لە چەندین ڕووەوە، وەک لایەنی دەروونی، مەعنەوی، و تەنانەت ئابووری.
بەهۆی ئەم بارودۆخەوە، هەزاران قوتابی ناچار بوون بۆ بەردەوامیدان بە خوێندنەکەیان و بەدەستهێنانی بڕوانامەی دانپێدانراو، ڕوو بکەنە پارێزگاکانی دیکەی سووریا کە لەژێر کۆنترۆڵی حکوومەتی دیمەشق دان یان ناوچەکانی دیکە، ئەمەش بارگرانییەکی زۆری خستووەتە سەر قوتابییان و خێزانەکانیان و داهاتووی نەوەیەکی لە پرسیاردا هێشتووەتەوە.
