بەڕێوەبەری فڕۆکەخانەی هەولێر: گەشتە ئاسمانییەکانمان ئاسایی بوونەوە

گەشتە ئاسمانییەکان لە فڕۆکەخانەی نێودەوڵەتیی هەولێر ئاسایی بوونەتەوە.

ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر بە ماڵپەری کوردستان24ـی راگەیاند، "لەسەر بنەمای رێنماییەکانی دەسەڵاتی فڕۆکەوانیی عێراق؛ دوانیوەڕۆی ئەمڕۆ دووشەممە، 08ـی حوزەیرانی 2026، گەشتە ئاسمانییەکانمان ئاسایی کردووەتەوە". 

ئەحمەد هۆشیار ئاماژەی بەوەش کرد، لە کاتژمێر 12:00ـی شەوی رابردووەوە تا نیوەڕۆی ئەمڕۆ، ژمارەیەکی زۆری گەشتە ئاسمانییەکان فڕۆکەخانەی نێودەوڵەتیی هەولێر هەڵوەشێنراوەتەوە و سەرقاڵی کۆکردنەوەی داتان لەبارەی هەڵوەشاندنەوەی گەشتەکان. 

ئەمڕۆ دووشەممە، 08ـی حوزەیرانی 2026، دەسەڵاتی فڕۆکەوانیی سڤیلی عێراق لە راگەیەنراوێکدا رایگەیاند، ئاسمانی عێراق بە رووی هەموو گەشتە ئاسمانییەکانی هاتن و چوون لە تەواوی فڕۆکەخانەکان کرایەوە. ئاماژەی بەوەش کرد، جووڵەی فڕین بەپێی رێکارە کارپێکراوەکان دەستیپێکردووەتەوە.

روونیشی کردەوە، بەردەوام دەبن لە چاودێریکردنی دۆخەکە و هەڵسەنگاندنی ئاسایش بە هەماهەنگی لەگەڵ لایەنە پەیوەندیدارەکان. جەختی لەسەر پاراستنی بەرزترین ئاستی سەلامەتی و ئاسایش بۆ ئاسمانی وڵات کردەوە.

ئەوەشی خستە روو، کۆمپانیاکانی فڕین و گەشتیاران لە هەر گۆڕانکارییەکی نوێ لە رێگەی کەناڵە فەرمییەکانەوە ئاگادار دەکرێنەوە.

ئەم بڕیارەی دەسەڵاتی فڕۆکەوانیی سڤیل بۆ دەستپێکردنەوەی گەشتەکان، لە کاتێکدایە، پێشتر بڕیاری داخرانی تەواوەتیی ئاسمانی عێراق درابوو؛ بڕیار بوو ئەو قەدەخەیە 72 کاتژمێر بخایەنێت و لە ئێوارەی 7ی حوزەیرانەوە تاوەکو ئێوارەی 10ی حوزەیران بەردەوام بێت.