ئەمریکا و کۆڵۆمبیا بۆ لێدانی باندەکانی ماددەی هۆشبەر رێککەوتن

پێت هێگسێت، وەزیری جەنگی ئەمریکا رایگەیاند، کۆڵۆمبیا رەزامەندی دەربڕیوە بۆ ئەنجامدانی ئۆپەراسیۆنی سەربازیی هاوبەش لەگەڵ ئەمریکا، ئەم هەنگاوە ئامانج لێی لێدانی باندەکانی ماددەی هۆشبەرە و پەرەپێدانی هەڵمەتەکانی واشنتنە دژی قاچاخچییەکان لە ئەمریکای لاتین.

پێنجشەممە 13ـی ئابی 2026، وەزیری جەنگی ئەمریکا لە کۆنفرانسێکدا لە پەنەما ئاماژەی بەوە کرد، بوگۆتا داوای لە پێنتاگۆن کردووە هاوکارییان بکات لە جەنگی دژی تیرۆر و بازرگانی ماددەی هۆشبەر و رێگەی داوە بە جێبەجێکردنی ئۆپەراسیۆنی سەربازی بۆ تێکشکاندنی تۆڕە تیرۆریستییەکان، هێگسێت ئەم هەنگاوەی بە نموونەیەکی کاریگەر بۆ هاوبەشیی چالاک وەسف کرد کە تیشک دەخاتە سەر لایەنە مەیدانییەکان.

ئەم پێشهاتە لە کاتێکدایە، سوپای ئەمریکا لە مانگی ئەیلوولی رابردووەوە هەڵمەتێکی بۆردومانی بۆ سەر ئەو بەلەمانە دەستپێکردووە کە گومانی گواستنەوەی ماددەی هۆشبەریان لێ دەکرێت، ئەمەش تا ئێستا بووەتە هۆی کوژرانی 215 کەس، هەرچەندە ئیدارەی ترەمپ بەڵگەی تەواوی بۆ تێوەگلانی ئەو بەلەمانە نەخستووەتە روو، بەڵام رێکخراوە مافپەروەرییەکان نیگەرانن لەوەی ئەم هێرشانە وەك کوشتنی دەرەوەی یاسا هەژمار بکرێن.

لەلایەکی دیکەوە، ئەبێلاردۆ دی لا ئێسپرییا، سەرۆکی نوێی کۆڵۆمبیا کە پەیڕەوی رێبازی راستڕەوی توندڕەو دەکات، بەڵێنی داوە بەبێ بەزەیی رووبەڕووی تیرۆر و ماددەی هۆشبەر ببێتەوە، ئەو سەرۆکە کە سەرسامی خۆی بۆ ترەمپ و سەرۆکی سەلڤادۆر دەربڕیوە، رایگەیاندووە دانوستانەکانی ئاشتی لەگەڵ گرووپە چەکدارەکان رادەگرێت و هەوڵی پێکهێنانی هاوپەیمانییەکی سەربازی لەگەڵ ئەمریکا و ئیسرائیل دەدات.

لە کۆتاییدا، وەزارەتی دەرەوەی ئەمریکا ئاشکرای کردووە، ئیدارەی ترەمپ پلانی هەیە بە هەماهەنگی لەگەڵ کۆنگرێس، هاوکارییەکی ئەمنیی بە بڕی یەك ملیار دۆلار بۆ پشتگیریکردنی حکوومەتە نوێیەکەی کۆڵۆمبیا دابین بکات.