ئازاری کۆڵبەران بەبێ دەنگی نمایش دەکرێت

شانۆگەری "بێدەنگ"، لە نووسین و دەرهێنانی سۆران حوسێنی، بە شێوازێکی جیاواز و فراوان، باسی کاری کۆڵبەری و ئازارەکانی کۆڵبەرانی لە رۆژهەڵاتی کوردستان دەگیڕێتەوە.

ئەمڕۆ پێنجشەممە، 20ی ئابی 2026، سۆران حوسێنی، دەرهێنەری شانۆگەرییەکە بە کوردستان24ی راگەیاند، ئەم شانۆگەرییە لەلایەن گروپی نێودەوڵەتی شانۆی زێد و بە نووسین و دەرهێنانی خۆم لە چوارڕیانی شەبرەنگی کرماشانەوە بە هەشت بەش بەردەوام دەبێت؛ هەر بەشێک جیهان و دۆخێکی تایبەتی خۆی هەیە و بەشێک لە چیرۆکی گشتیی شانۆگەرییەکە دەگێڕێتەوە، تا گەشتە شانۆییەکە لە کۆتاییدا بە دەریاچەی زەریبار لە مەریوان دەگات.

گوتیشی "ئەم شانۆگەرییە تەنیا هەوڵێک نییە بۆ باسکردنی کۆڵبەری، بەڵکو ئامانجمان ئەوەیە بینەر لە ناو رووداوەکەدا دابنێین. ئێمە تەنیا باس لە کۆڵبەری ناکەین؛ هەوڵ دەدەین بینەر لەگەڵ خۆمان ببەینە ناو ئەم رووداوە. بینەر تەنیا سەیرکەر نییە، بەڵکو لەگەڵ ئەکتەرەکاندا دەڕوات و لە هەر بەشێکی رێگەکەدا رووبەڕووی دۆخێکی نوێ دەبێتەوە."

ئەو دەرهێنەرە باس لە گرنگیی ئەو شانۆگەرییە دەکات و دەڵێت "ئەم شانۆگەرییە بە شێوەیەک داڕێژراوە کە جەستە و بێدەنگی ببنە سەرچاوەی گێڕانەوە، لەگەڵ میوزیکی زیندوو و وێنە کە هەستی بینەر لە جیهانی کۆڵبەران نزیک دەکەنەوە. لە پشت هەر بارێکەوە مرۆڤێک هەیە؛ مرۆڤێک کە خەون، خێزان، هیوا و مافەکانی خۆی هەیە. ئێمە دەمانەوێت بینەر تەنیا ئەمە نەبینێت، بەڵکو هەستی پێ بکات."

ئەوەشی گوت، "ئەم گەشتە شانۆییە نزیکەی 2 تا 3 کاتژمێر بەردەوام دەبێت و نزیکەی 85 هونەرمەند، لەوانە بازیار، ئەنجامدەرانی شانۆی فیزیکاڵ و گروپی میوزیکی زیندوو، بەشداری تێدا دەکەن."

دەربارەی ئامانج و مەبەستی شانۆگەرییەکە، سۆران حوسێنی دەڵێت "مەبەستی شانۆگەرییەکە تەنیا پیشاندانی ئازاری کۆڵبەر نییە، بەڵکو کردنەوەی گفتوگۆیەکی کۆمەڵایەتییە لەسەر ژیان و کەرامەتی مرۆڤ، بۆ ئێمە تەنیا نمایشێک نییە؛ بەڵکو گفتوگۆیەکە لەگەڵ کۆمەڵگە. گفتوگۆیەک دەربارەی ژیان، ئازار، کەرامەتی مرۆڤ و ئەو مافانەی کە هەموو مرۆڤێک شایستەیەتی."

سۆران حوسێنی باس لە گرنگیی میوزیک لەو نمایشە دەکات و دەڵێت "لە بەشی میوزیکی ئەم شانۆگەرییەدا، هێمن ئەنساری و محەمەد رۆزخۆش بەشدارن، بۆ ئەوەی دەنگ و میوزیک ببێتە بەشێکی گرنگ لە دروستکردنی کەشی نمایشەکە."

 سۆران حوسێنی ئاماژەی بەوەش دا، "ناوی "بێدەنگ" خۆی پەیامێکی گرنگ هەڵدەگرێت؛ چونکە لەو شوێنەی وشەکان ناتوانن هەموو ئازارەکان بدوێن، جەستە و جوڵە و بێدەنگی دەبنە زمانی گێڕانەوە. دەمانەوێت بینەر تەنیا نمایشەکە نەبینێت؛ بەڵکو لەگەڵیدا بڕوات، هەستی پێ بکات و دوای کۆتایی نمایشەکە، هێشتا بیر لەوە بکاتەوە کە چی بینی."

 شانۆگەری "بێدەنگ"، لە نووسین و دەرهێنانی سۆران حوسێنییە و باس لە ژیان و ئێش و ئازاری کۆڵبەرەکان دەکات،  بڕیارە 29ی ئابی 2026، لە رۆژهەڵاتی کوردستان نمایش بکرێت.