ئێران دەستگیرکردنی شانەیەکی چەکداری لە پارێزگای فارس رادەگەیەنێت

سوپای پاسدارانی ئێران رایگەیاند، شانەیەکی چەکداریی سەر بە رەوتی پاشایەتییان لە پارێزگای فارس لە باشووری ئێران دەستگیرکردووە کە لە 8 ئەندام پێکهاتووە، هاوکات دەزگاکانی سەر بە سوپای پاسداران لە پارێزگای ئازەربایجانی رۆژئاوا، دەستبەسەرداگرتنی بڕێک چەک و تەقەمەنییان لەو پارێزگایە راگەیاند.
یەکشەممە 6ـی ئەیلوولی 2026، ئاژانسی هەواڵی فارس لە زاری سوپای پاسدارانەوە بڵاویکردەوە، ئەندامانی ئەو شانەیە پەیوەندییان بە گرووپە دژبەرەکانی حکوومەتەوە هەبووە و پلانیان بۆ دابینکردنی چەک بە مەبەستی کوشتنی هاووڵاتییان لە کاتی خۆپیشاندانە ئەگەرییەکاندا داڕشتووە.
سوپای پاسداران لە بەیاننامەیەکدا روونیکردەوە، دەستگیرکراوەکان بە شێوەیەکی چالاک بەشدارییان لەو پشێوییانەدا کردووە کە لە کانوونی یەکەمی 2025 و کانوونی دووەمی 2026 لە ئێران روویانداوە. ئەوان تۆمەتبارن بە پلاندانان بۆ هێرشکردنە سەر شوێنەکان بە بەکارهێنانی توندوتیژی، سووتاندنی تایە، داخستنی رێگەوبان و تێکدانی موڵک و ماڵی گشتی.
بەیاننامەکە هیچ وردەکارییەکی لەبارەی ناسنامەی دەستگیرکراوەکان یان جۆری ئەو چەکانەی دەستیان بەسەردا گیراوە نەخستە روو. هەروەها هیچ روونکردنەوەیەک لەلایەن دەستگیرکراوەکان یان پارێزەرەکانیانەوە لەبارەی ئەو تۆمەتانەوە بڵاو نەکراوەتەوە. رەوتی پاشایەتی لە ئێران بزووتنەوەیەکی سیاسییە کە هەوڵی رووخاندنی کۆماری ئیسلامی و گێڕانەوەی سیستمی پاشایەتی دەدات کە لە دوای شۆڕشی 1979ـەوە کۆتایی هاتبوو.
لەلایەکی دیکەوە، دەزگاکانی سەر بە سوپای پاسداران لە پارێزگای ئازەربایجانی رۆژئاوا لە باکووری رۆژئاوای ئێران، دەستبەسەرداگرتنی بارێک چەک و تەقەمەنییان لە ئۆپەراسیۆنێکی ئەمنیدا راگەیاند. میدیاکانی ئێران پێشتر باسیان لە دەستبەسەرداگرتنی چەک و تەقەمەنی لەو پارێزگایە کردبوو، لەوانەش کڵاشینکۆف، تەقەمەنی و نارنجۆکی دەستی، کە بە گوتەی بەرپرسانی ئێران، ئامانج لێی رێگریکردن بووە لە گەیشتنی ئەو چەکانە بە گرووپە چەکدارەکان.
ئەم رووداوانە لە کاتێکدایە کە دەزگا ئەمنییەکانی ئێران رێوشوێنەکانیان لە ژمارەیەک پارێزگا بە تایبەت لە ناوچە سنوورییەکان توندتر کردووە. بەرپرسانی حکوومەت چەندان گرووپ تۆمەتبار دەکەن بە هەوڵدان بۆ کاری چەکداری یان تێکدانی ئاسایشی ناوخۆی وڵات، ئەوەش لە سێبەری ململانێکانی نێوان ئێران و ئەمریکا.