هەولێر هەزاران دار بۆ سەوزکردنی شارەکە دەچێنرێن

بەگوێرەی راگەیەندراوێکی پارێزگای هەولێر، بە مەبەستی جوانکاری و بەرزکردنەوەی ئاستی سەوزایی لە شارەکەدا، پڕۆسەیەکی بەرفراوانی چاندنی درەخت دەستیپێکردووە و بڕیارە تا کۆتایی ئەم مانگە هەزاران دار لە شوێنە جیاوازەکاندا بچێنرێن.

چوارشەممە 7ـی تشرینی یەکەمی 2026، پارێزگای هەولێر رایگەیاند، تیمەکانی بەڕێوەبەرایەتیی ئەندازەی پارکەکان سەر بە پارێزگای هەولێر، دەستیانکردووە بە چاندنی سەدان دار لە جۆرەکانی (سیسەم و ناروەند) لە هەردوو شوێنی دیاریکراوی شەقامی 60 مەتری و ژێر قەڵای مێژوویی هەولێر.

بەگوێرەی پلانی بەڕێوەبەرایەتییەکە، ئەم هەڵمەتە بەردەوامیی دەبێت و تا کۆتایی مانگی تشرینی یەکەم هەزاران دار لە ناوچە و گەڕەکە جیاوازەکانی سنووری سەرۆکایەتیی شارەوانیی هەولێر دەچێنرێن. هاوکات ئەندازەی پارکەکان دووپاتیکردەوە، بە هاوکاریی هاووڵاتییان، رێکخراوە ژینگەییەکان و چالاکوانان، هەنگاوی زیاتر بۆ فراوانکردنی رووبەری سەوزایی لە تەواوی شارەکەدا دەگرنە بەر.

لە ماوەی ساڵانی رابردوودا، پرسی زیادکردنی سەوزایی لە هەولێر بووەتە یەکێک لە کارە لەپێشینەکانی لایەنە پەیوەندیدارەکان بە مەبەستی گەیشتن بە ستانداردە جیهانییەکان و بەرزکردنەوەی رێژەی سەوزایی بۆ سەرووی 20%ـە. پسپۆڕانی بواری ژینگەش جەختدەکەنەوە، بەهۆی گۆڕانی کەشوهەوا، گەرمای توندی وەرزی هاوین و دیاردەی خۆڵبارین، پەرەپێدانی دارستان و چاندنی درەختی گونجاو لەگەڵ ژینگەی ناوچەکە (وەک سیسەم و ناروەند)، رۆڵێکی بنەڕەتی لە کەمکردنەوەی پلەکانی گەرما، پاککردنەوەی هەوای شارەکە و رووبەڕووبوونەوەی کاریگەرییە نەرێنییەکانی بیابانبوون دەگێڕێت.