ئەمریکا 4 ملیۆن بەرمیل نەوتی یەدەگ دەخاتە بازاڕەوە

 وەزارەتی وزەی ئەمریکا رایگەیاند، رەزامەندیی لەسەر پڕۆژەیەکی ئاڵوگۆڕی بەپەلەی نزیکەی 4 ملیۆن بەرمیل نەوتی خاو لە کۆگاکانی یەدەگی ستراتیژییەوە دەربڕیوە. ئەم هەنگاوە بۆ چارەسەرکردنی پچڕانی دابینکردنی نەوت گیراوەتەبەر، کە بەهۆی زریانی ئیسایاسەوە روویداوە.

شەممە 10ـی تشرینی یەکەمی 2026، کریس رایت، وەزیری وزەی ئەمریکا لە راگەیەندراوێکدا گوتی: "وەزارەتی وزە بەخێرایی کاردەکات لە رێگەی ئەم ئاڵوگۆڕە بەپەلەیەوە بۆ یارمەتیدانی پاراستنی کارەکانی پاڵاوتن، کەمکردنەوەی پچڕانی دابینکردنی سووتەمەنی و دڵنیابوون لەوەی خێزان و کۆمپانیاکانی ئەمریکا وزەیەکی هەرزان، متمانەپێکراو و سەلامەتیان دەستدەکەوێت."

لەلایەکی دیکەوە، بەڕێوەبەرایەتیی کانزاکانی دەریایی ئەمریکا رایگەیاند، کۆمپانیاکانی نەوت و گاز لە کەنداوی مەکسیک تاوەکو پێنجشەممەی رابردوو، بەهۆی زریانی ئیسایاسەوە 62.89%ـی بەرهەمهێنانی نەوت و 57.35%ـی بەرهەمهێنانی گازی سروشتییان راگرتووە.

بەڕێوەبەرایەتییەکە روونیکردەوە، کرێکاران لە 121 سەکۆی بەرهەمهێنان گواستراونەتەوە، کە ئەوەش دەکاتە 32.61%ـی کۆی 371 سەکۆی کارپێکراو لە کەنداوەکەدا. 

هەروەها روونیکردەوە، کرێکاران لە 5 سەکۆی هەڵکۆڵین گواستراونەتەوە کە بە سیستمی جێگیرکردنی جووڵاو تەیار نەکراون، ئەمەش 45.45%ـی کۆی 11 سەکۆی هەڵکۆڵینی لەو جۆرەیە کە ئێستا لە ناوچەکەدا کاردەکەن.

سەبارەت بە هەوڵەکانی فریاکەوتن، ئیدارەی ترەمپ بڕیاریدا باری نائاسایی فیدراڵی لە ویلایەتەکانی فلۆریدا و ئەلاباما رابگەیەنێت. ئەم بڕیارە رێگە بە ئاژانسی فیدراڵی بۆ بەڕێوەبردنی باری نائاسایی دەدات یارمەتیی فیدراڵی بۆ کارەساتەکان پێشکەش بکات بە مەبەستی پاڵپشتیکردنی هەوڵەکانی فریاکەوتن لەسەر ئاستی ویلایەتەکان و بەرپرسانی خۆجێیی.