شێروان دووبەردانی: پڕۆژەیاسای بودجە پڕە لە مینی چێندراو بۆ هەرێمی کوردستان

پەرلەمانتارێکی کورد ئاشکرای دەکات، پڕۆژەیاسای بودجە پڕە لە مینی چێندراو بۆ هەرێمی کوردستان، داواش دەکات پەرلەمانتارانی کورد بەیەکەوە رووبەڕووی مەترسییەکان ببنەوە.

شێروان دووبەردانی بە کوردستان24ـی راگەیاند "پڕۆژەیاسای بودجە کارەساتە و هیچ رەچاوێکی مافە دەستوورییەکانی هەرێمی کوردستان تێدا نەکراوە، هەروەها لەسەر بنەمای ئەنجامی سەرژمێریی دانیشتووان دانەنراوە."

ئەو پەرلەمانتارەی فراکسیۆنی پارتی جەختیکردەوە، لەنێو پڕۆژەیاساکەدا دەیان مینی چێندراو بۆ هەرێمی کوردستان دانراونەتەوە، ئەگەر بەو شێوەیە تێپەڕێنرێت، کاریگەریی نەرێنیی لەسەر هەرێمی کوردستان دەبێت.

لەبارەی وردەکاریی کێشەکانەوە، شێروان دووبەردانی گوتیشی "دانانی مەرجی 400 هەزار بەرمیل نەوتی رۆژانە، داهاتی نانەوتی و قەرزەکانی بانکی بازرگانیی عێراق، لەو بەربەستانەن کە لەنێو پڕۆژەیاساکەدا هەن."

بە گوتەی ئەو پەرلەمانتارە، پشکی هەرێمی کوردستان بۆ کەمتر لە 12% دابەزێنراوە، لە کاتێکدا دەبێت 14.14% بێت، روونیشیکردەوە، ناکرێت بودجەی وەزارەتی پەروەردەی عێراق 13 ترلیۆن و 800 ملیار دینار بێت و بودجەی یەک وەزارەت بە تەنیا لە پشکی هەرێمی کوردستان زیاتر بێت.

سەبارەت بە شێوازی مامەڵەکردن لەگەڵ مووچەخۆران ئاماژەی بەوەش دا "ناکرێت کەسێک لە ئوسترالیا مووچە لە عێراق وەربگرێت، بەڵام حکوومەتی عێراق سزای مووچەخۆرانی هەرێمی کوردستان بدات لە ئەگەری رادەستنەکردنی تەواوی داهاتەکان."

لەبارەی هەڵوێستی فراکسیۆنە کوردستانییەکان، دووبەردانی رایگەیاند "هیچ چارەسەر و میکانیزمێک جگە لە پێکەوە کارکردنی فراکسیۆنە کوردستانییەکان بۆ رووبەڕووبوونەوەی ئەو مەترسییانە نییە."

زانیارییەکانی کوردستان24 ئاماژە بەوە دەکەن، گفتوگۆ و کۆبوونەوەکانی فراکسیۆنە کوردستانییەکان بەردەوامە و تا ئێستا سەرجەمیان لەسەر رەتکردنەوەی پڕۆژەیاسای بودجەی گشتی بەو شێوەیەی ئێستا هاوڕان.

لەلایەکی دیکەوە هەرێم کەمال ئاغا، سەرۆکی فراکسیۆنی یەکێتی لە پەرلەمانی عێراق بە کوردستان24ـی راگەیاند، بەم شێوازەی ئێستا دەنگ بە پڕۆژەیاسای بودجە نادەین و ناکرێت یاساکە بە زیانی مافەکانی خەڵک تێپەڕێنرێت.

هاوکات گوتەبێژی فراکسیۆنی پارتی دیموکراتی کوردستان بۆ کوردستان24 هەمان هەڵوێستی دووپات کردەوە و جەختیکردەوە، بەبێ گەرەنتیکردنی شایستە داراییەکان و مافە دەستوورییەکانی هەرێمی کوردستان، دەنگ بە پڕۆژەکە نادەین.

هەرێمی کوردستان لە پڕۆژەیاسای بودجەی 2027 داوای پشکی 14%ـی بە گوێرەی ئەنجامی سەرژمێریی دانیشتووان دەکات.

ئەم هاودەنگییە سیاسییە هاوکێشەی یاسادانان لە پەرلەمانی عێراق دەخاتە بەردەم قۆناخێکی دژوار و لایەنە دەسەڵاتدارەکانی بەغدا ناچار دەکات پێداچوونەوە بکەن، پەیامی کورد لە بەغدا یەکلاکەرەوەیە؛ هیچ بودجەیەک شەرعییەتی تێپەڕبوونی نابێت ئەگەر ماف و شایستە داراییەکانی هەرێمی کوردستان پشتگوێ بخات.