عێراق مریشکی چینی هاوردە دەکات
عێراق لەگەڵ ژمارەیەک وڵاتی دیکەدا هەوڵی هاوردەکردنی مریشکی چینی دەدات. ئەم هەنگاوە لە کاتێکدایە کۆمپانیا چینییەکان بازاڕەکانی جیهانیان فراوانتر کردووە و سوود لە زۆریی بەرهەم و دابەزینی نرخەکانیان وەردەگرن. بەگوێرەی راپۆرتێکی ئاژانسی رۆیتەرز، ئەم پەرەسەندنە رکابەریی نێوان چین و گەورە هەناردەکارانی مریشک لە ئاستی جیهانیدا زیاد دەکات.
دانگ یانگ یانگ، بەڕێوەبەری گشتیی کۆمپانیای وینتوبی چینی بۆ خۆراک رایگەیاند، کۆمپانیاکەیان پێشوازیی لە کڕیارانی عێراق، غانا، ئوردن، رووسیا و سینیگال کردووە، کە خواستی خۆیان بۆ کڕینی مریشکی چینی نیشانداوە. ئەو کۆمپانیایە ساڵانە نزیکەی 60 ملیۆن مریشک بەرهەم دەهێنێت و بەرهەمەکانی بۆ زیاتر لە 20 وڵات هەناردە دەکات. هەناردەکردن لە ساڵی رابردوودا نیوەی قازانجی ئەو کۆمپانیایەی پێکهێناوە.
بۆ عێراق، فراوانبوونی هەناردەی مریشکی چینی لەوانەیە بژاردەی هەرزانتر بۆ هاوردەکاران دابین بکات، هەرچەندە نرخە کۆتاییەکان بەندە بە تێچووی گواستنەوە، دابینکردن، مەرجەکانی هاوردەکردن و چاودێریی تەندروستی. دانگ روونیکردەوە، بەرهەمەکانی کۆمپانیاکەیان خاوەن تایبەتمەندیی نرخن، بە جۆرێک نرخەکەیان بە نزیکەی 1,000 دۆلار بۆ هەر تەنێک لە بەرهەمە رکابەرەکانی بەرازیلی و تایلاندی کەمترە.
ئەم فراوانبوونەی چین لە کاتێکدایە بەرهەمهێنان زیادی کردووە و داواکاریی ناوخۆیی لەسەر هەندێک جۆری گۆشت دابەزیوە. ئەم دۆخە کۆمپانیاکانی ناچار کردووە بەرهەمە زیادەکانیان لە بازاڕەکانی دەرەوە ساخ بکەنەوە. بەگوێرەی داتاکانی گومرگی چین، هەناردەکردنی بەرهەمەکانی مریشکی چین لە ساڵی 2025دا گەیشتووەتە 2.6 ملیار دۆلار، کە دەکاتە نزیکەی دوو هێندەی ئاستەکەی لە ساڵی 2020.
پێشبینی دەکرێت هەناردەکردنی بەرهەمەکانی شیری چین لە ساڵی 2026دا بگاتە 600 ملیۆن دۆلار. ئەمەش بەرزبوونەوەیەکە کە لە ماوەی سێ ساڵدا دەبێتە دوو هێندە.