سوپای یەمەن: زیاتر لە هەزار هێرشمان کردووەتە سەر حووسییەکان
هێزە چەکدارەکانی یەمەن رایانگەیاند، لە ماوەی 24 کاتژمێری رابردوودا، 1164 ئۆپراسیۆنی بەئامانجگرتنی وردیان دژی چەکدارانی حووسییەکان ئەنجامداوە، لە بەرامبەریشدا حووسییەکان بە مووشەکی بالیستی چەندین بنکە و کۆبوونەوەی سەربازییان کردووەتە ئامانج.
دووشەممە 18ـی تشرینی یەکەمی 2026، بەگوێرەی راپۆرتی میدیا یەمەنییەکان، سوپای فەرمیی ئەو وڵاتە رایگەیاندووە، لە پارێزگای تەعز پێشڕەوییان کردووە و دەستیان بەسەر چەند پێگەیەکی نوێدا گرتووە و حووسییەکانیان ناچار بە پاشەکشە کردووە. هاوکات کۆنترۆڵی ئاگرینی خۆیان بەسەر رێڕەوەکانی جووڵەی ئەو هێزانە لە کەناراوەکانی رۆژئاوا سەپاندووە و گردبوونەوەیەکی چەکدارانی حووسییان لە ناوچەی "زەباب" لە رۆژئاوای تەعز بۆردومان کردووە.
لە بەرامبەردا، یەحیا سەریع، گوتەبێژی سەربازیی حووسییەکان روونیکردەوە، هێزەکانیان لە رێگەی بەکارهێنانی مووشەکی بالیستییەوە، هێرشیان کردووەتە سەر کۆبوونەوە سەربازییەکان لە هەردوو ناوچەی "سەقیا" و "رەئس عارە" لە پارێزگای لەحج. یەحیا سەریع جەختیشی کردەوە، پێگەیەکی هێزەکانی یەمەنیان لە سەربازگەی "عەلەم" لە پارێزگای شەبووە کردووەتە ئامانج و بەهۆیەوە ژمارەیەک کوژراو و بریندار کەوتوونەتەوە.
ئەم پەرەسەندنە سەربازییانە لە کاتێکدان، یەکشەممە گوتەبێژی حووسییەکان خستنەخوارەوەی فڕۆکەیەکی بێفڕۆکەوانی چەکداری سیخوڕیی سەربە هێزەکانی سعوودیەی لە جۆری (کارایێل) لە ئاسمانی پارێزگای حەجە راگەیاند. هەروەها ماوەی نزیکەی دوو هەفتەیە هێرشی درۆنی و مووشەکیی حووسییەکان بۆ سەر ناوخۆی سعوودیە بە شێوەیەکی رۆژانە بەردەوامە، کە توندترینیان 10ـی ئەم مانگەدا فڕۆکەخانەی نێودەوڵەتیی ریازی کردە ئامانج و لە ئەنجامدا 13 کەس گیانیان لەدەستدا و نزیکەی 300 کەسی دیکەش بریندار بوون.