قەتەر و ئێران ئاسایشی گەرووی هورمز و کەرتی وزە تاوتوێ دەکەن

میری قەتەر لەگەڵ سەرۆککۆماری ئێران لە مۆسکۆ کۆبووەوە و پێکەوە دوایین پێشهاتە هەرێمییەکان، رەوتی دانوستانەکان و پرسی پاراستنی ئاسایشی گەرووی هورمز و هێڵەکانی گواستنەوەی وزەیان تاوتوێ کرد.

سێشەممە، 27ـی تشرینی یەکەمی 2026، تەمیم بن حەمەد ئال سانی، میری قەتەر و مەسعود پزیشکیان، سەرۆککۆماری ئێران، لە پەراوێزی بەڕێوەچوونی کۆڕبەندی نێودەوڵەتیی وزە لە مۆسکۆی پایتەختی رووسیا کۆبوونەوە.

دیوانی میریی قەتەر، لە راگەیەنراوێکدا ئاماژەی بەوە کرد، لە کۆبوونەوەکەدا گفتوگۆ لەبارەی بارودۆخی هەستیاری ناوچەکە کرا و تیشک خرایە سەر گرنگترین گۆڕانکارییەکان، بە تایبەت ئاسایشی گەرووی هورمز، هەناردەکردنی نەوت و گاز و رەوتی دانوستانە هەڵپەسێردراوەکان.

لە بەشێکی دیکەی کۆبوونەوەکەدا، هەردوولا پێداگرییان لەسەر بایەخی پتەوکردن و قووڵکردنەوەی پەیوەندییە سیاسی و ئابوورییەکانی نێوان دەوحە و تاران کردەوە و، ئاماژەیان بە پێویستیی سوودوەرگرتن لە سەرجەم توانا و دەرفەتە بەردەستەکان کرد بۆ گەشەپێدانی هاوکارییە دووقۆڵییەکان، بە جۆرێک کە لە خزمەت پاراستنی ئاسایش، هێورکردنەوەی تەنگژەکان و سەقامگیریی جیۆپۆلەتیکی و ئابووریی سەرانسەری ناوچەکەدا بێت.

لە سەرەتای دەستپێکردنی گرژی و ئاڵۆزییە قووڵەکانی نێوان ئەمریکا و کۆماری ئیسلامیی ئێران، وڵاتی قەتەر توانیویەتی پێگەیەکی بێوێنە وەک پردی سەرەکیی پەیوەندی و نێوەندگیرێکی جێی متمانەی هەردوولا لە ناوچەکەدا مسۆگەر بکات. دەوحە تەنیا رۆڵی گەیاندنی پەیامی فەرمی نەبینیوە، بەڵکو بووەتە چەقی دانوستانی ناڕاستەوخۆ، چارەسەری گرێکوێرە دیپلۆماسییەکان.