دکتۆر محەممەد شوکری سەرۆکی دەستەی وەبەرهێنانی هەرێمی کوردستان تایبەت بۆ کوردستان24 گوتی: ئەمساڵ، شاندی هەرێمی کوردستان بۆ داڤۆس26 جیاواز و فراوانترە، یاوەری سەرۆک وەزیران، مەسرور بارزانی، 20 وەبەرهێنەری کەرتی تایبەت بەشداری کۆبوونەوەکانی کۆڕبەندی ئابووریی جیهانی دەبن.

ئەم هەنگاوەش لە چوارچێوەی ستراتیژیی سەرۆک وەزیراندایە، کە لە هەر گەشت و دیدارێکی نێودەوڵەتیدا، شاندێکی بازرگانی و وەبەرهێنەران یاوەری بن بۆ بەهێزکردنی پەیوەندییە ئابوورییەکانی کوردستان.

ڕۆژی دووشەممە، 19ـی کانوونی دووەمی 2026، 56ـەمین کۆڕبەندی ئابووریی جیهانیی "داڤۆس" لە سویسرا بەڕێوەدەچێت. جیا لە سەدان سەرکردە و سەرۆک، نوێنەر و دیپلۆماتکاری وڵاتان، دەیان شارەزا و پسپۆڕی بواری تەکنەلۆژیا و ژیری دەستکرد بەشدار دەبن. 

لەم چوارچێوەیەدا، ئامادەبوونێکی بەرچاوی ئەمریکا بە سەرۆکایەتیی سەرۆك دۆناڵد ترەمپ بە سەرۆکایەتیی گەورەترین شاندی ئەمریکا، پێکهاتوو لە وەزیرانی دەرەوە و خەزێنەی ئەمریکا و وزە و بازرگانی، لە مێژووی کۆڕبەندەکەدا بەرجەستەیە. جگە لە بەشداریی سەرکردەکانی G7 و سەرۆکی کۆمیسیۆنی ئەورووپا ئورسولا ڤۆن دێر لاین و سەرۆکی ئۆکرانیا ڤۆلۆدیمیر زیلینسکی و نوێنەرانی ئابوورییە گەورە و تازە پێگەیشتووەکان.

لەناو ئەم دیمەنە نێودەوڵەتییەدا بەشداریی هەرێمی کوردستان و دەوڵەتمەدار مەسرور بارزانی، بەهۆی ڕەهەندە سیاسی و ئابوورییەکانی بایەخێکی تایبەتی پێدەدرێت، کە لە پرۆتۆکۆلێکی سادە تێدەپەڕێت.

لە 19ـی ئەم مانگە 56ـەمین لوتکەی کۆڕبەندی ئابووریی جیهانی لە شارۆچکەی داڤۆس لە سویسرا بەڕێوەدەچێت، نزیکەی سێ هەزار سەرکردە و داهێنەر و خاوەن و بەڕێوبەری جێبەجێکاری کۆمپانیاکان لەژێر دروشمی "روحی گفتوگۆ"، لەو کۆڕبەندە بەشدار دەبن.

لە نێو بەشداربووە دیارەکانی 56ـەمین کۆڕبەندی ئابووریی جیهانیی (داڤۆس) سکرتێری گشتیی نەتەوە یەکگرتووەکان، ئەنتۆنیۆ گۆتێرێس، بەڕێوەبەری گشتیی ڕێکخراوی تەندروستیی جیهانی، تێدرۆس ئەدهانۆم، سەرۆکی بانکی جیهانی، ئاجای بانگا، بەڕێوەبەری سندوقی دراوی نێودەوڵەتی، کریستالینا جۆرجیێڤا، بەڕێوەبەری گشتیی ڕێکخراوی بازرگانیی جیهانی، نگۆزی ئۆکۆنجۆ، و سکرتێری گشتیی ناتۆ، مارک ڕوتە، ئامادە دەبن.

لەم وێستگە گرنگەی هاوکاریی نێودەوڵەتیدا، کۆڕبەندی ئابووریی جیهان نزیکەی 3000 سەرکردەی کەرتە جیاوازەکان لە 130 وڵاتەوە کۆ دەکاتەوە. پێشبینی دەکرێت 400 سەرکردەی باڵای سیاسی، 65 سەرۆکی وڵات و حکوومەت، هەروەها شەش لە سەرکردەکانی گرووپی حەوت (G7) لە داڤۆس ئامادە بن.