بەرپرسانی ئیمارات ڕایانگەیاند کە رۆژی دووشەممە هێرشێکی درۆنی بووەتە هۆی کەوتنەوەی ئاگر لە کێڵگەیەکی نەوتیی سەرەکی لەو وڵاتەدا، ئەمەش لە کاتێکدایە کە ئێران بەردەوامە لە هێرشە درۆنی و موشەکییەکانی بۆ سەر ناوچەی کەنداو.

لایەنە پەیوەندیدارەکانی ئیمارات ئاماژەیان بەوە کردووە کە تیمەکانیان خەریکی کۆنترۆڵکردنی ئاگرەکەن لە کێڵگەی نەوتی "شا" (Shah)، بەبێ ئەوەی هیچ زیانێکی گیانی رابگەیەنن.

کێڵگەی نەوتی "شا" کە دەکەوێتە 230 کیلۆمەتری باشووری شاری ئەبو زەبی، توانای بەرهەمهێنانی نزیکەی 70 هەزار بەرمیل نەوتی خاوی هەیە لە رۆژێکدا، ئەمەش بەپێی ئامارەکانی کۆمپانیای وزەی حکومیی ئیمارات (ADNOC).

 پەیامنێری کوردستان24 لە بەغدا رایگەیاند، هۆتێل رەشید، کە باڵیۆزخانەی بەشێکی زۆر لە وڵاتانی تێدایە کراوەتە ئامانج.

هاوکات ئاژانسی فرانس پرێس (AFP) رایگەیاند، دەنگی تەقینەوەیەکی بەهێز لە بەغدای پایتەختی عێراق بیستراوە و دووکەڵ لە نزیک ناوچەی سەوز بەرز بووەتەوە.

ئەم ناوچەیە باڵیۆزخانەی ئەمریکا، نێردە دیپلۆماسییەکانی دیکە، دامەزراوە نێودەوڵەتییەکان و فەرمانگە حکومییەکانی تێدایە، جگە لەوەی شوێنی نیشتەجێبوونی بەرپرسانی باڵا و سیاسەتمەدارانە.

عەباس عێراقچی، وەزیری دەرەوەی ئێران لە تۆڕی کۆمەڵایەتی ئێکس ئاماژەی بەوە داوە، سەدان هاووڵاتیی مەدەنیی ئێرانی لە بۆردوومانەکانی ئیسرائیل و ئەمریکادا کوژراون، کە زیاتر لە 200 منداڵیان تێدایە. 

هەروەها باسی لەوە کردووە، بەگوێرەی ڕاپۆرتەکان، هەندێک لە وڵاتانی دراوسێ کە میوانداریی هێزەکانی ئەمریکا دەکەن و رێگە بە هێرشکردنە سەر ئێران دەدەن، بە شێوەیەکی چالاک هانی ئەم کۆمەڵکوژییە دەدەن، بۆیە پێویستە بە پەلە هەڵوێستەکان روون بکرێنەوە.

عەباس عێراقچی، وەزیری دەرەوەی ئێران، ئەمڕۆ دووشەممە جەختی لەوە کردەوە کە دەبێت جەنگ بە شێوەیەک کۆتایی بێت کە ڕێگە بە دووبارەبوونەوەی نەدات.

ئەمڕۆ دووشەممە، 16ـی ئاداری 2026، عەباس عێراقچی، وەزیری دەرەوەی ئێران رایگەیاند: ئەمریکا بە مەبەستی بەدەستهێنانی خۆبەدەستەوەدانی بێ مەرج دەستی بە جەنگ کرد، بەڵام ئێستا لە وڵاتانی دیکە دەپاڕێتەوە بۆ کردنەوەی گەرووی هورمز.

عێراقچی گوتیشی، پێویستە جەنگ بە شێوەیەک کۆتایی بێت کە رێگە بە دووبارەبوونەوەی نەدات.

وەزیری دەرەوەی ئێران ئاماژەی بەوە دا، ئێمە لە ناو بەرخۆداندایین و بەبێ هیچ پاشەکشەیەک بەردەوام دەبین، دووبارەی دەکەمەوە کە ئێمە هیچ پەیامێکمان نەناردووە و داوای هیچ ئاگربەستێکیشمان نەکردووە. 

ئەمڕۆ دووشەممە، 16ـی ئاداری 2026، دوو سەرچاوە بە ئاژانسی رۆیتەرزیان راگەیاند، پرۆسەی بارکردنی نەوت لە بەندەری فوجەیرەی ئیماراتی، راگیراوە، هۆکارەکەشی بۆ هێرشێکی فڕۆکەی بێفڕۆکەوان (درۆن) دەگەڕێتەوە، کە بووەتە هۆی کەوتنەوەی ئاگرێک لە ناوچەی پیشەسازییە نەوتییەکانی ئەو میرنشینەدا.

ئەمڕۆ دووشەممە، 16ـی ئاداری 2026، کییەر ستارمر، سەرۆکوەزیرانی بەریتانیا لە گوتارێکیدا رایگەیاند، کردنەوەی گەرووی هورمز کارێکی ئاسان نییە، ئاماژەی بەوەشکرد، نیازی دانوستان لەگەڵ ئێراندا هەیە سەبارەت بە هاتوچۆی کەشتیوانی لە رێگەی گەرووی هورمزەوە.

ئەمڕۆ دووشەممە، 16ـی ئاداری 2026، ئیسماعیل بەقایی، گوتەبێژی وەزارەتی دەرەوەی ئێران رایگەیاند، گەرووی هورمز بەتەواوی دانەخراوە، گوتیشی، هاتوچۆی کەشتییەکان، بە مەرجی تایبەت، رێگەپێدراون جگە لەو کەشتی و بەلەمانەی کە دوژمنی ئێرانن.

ئەمڕۆ دووشەممە، 16ـی ئاداری 2026، گوتەبێژی وەزارەتی دەرەوەی ئێران رایگەیاند، گەرووی هورمز بەتەواوی دانەخراوە، گوتیشی، هاتوچۆی کەشتییەکان، بە مەرجی تایبەت، رێگەپێدراون جگە لەو کەشتی و بەلەمانەی کە دوژمنی ئێرانن.

ئەمڕۆ دووشەممە، 16ـی ئاداری 2026، وەزیرانی وزەی وڵاتانی یەکێتی ئەوروپا زنجیرە کۆبوونەوەیەک ئەنجام دەدەن بۆ تاوتوێکردنی لێکەوتەکانی جەنگی نێوان (ئەمریکا و ئیسرائیل) لەگەڵ ئێران، کە بووەتە هۆی هەڵکشانی بەرچاوی نرخی وزە و دروستکردنی بارگرانی بۆ بەکاربەران و کۆمپانیاکان لە سەرانسەری کیشوەرەکەدا.