ئاژانسی هەواڵی فارسی ئێران بڵاویکردووەتەوە، کەمێک لەمەوبەر لە بەحرێن هێرشکراوەتە سەر بنکەیەکی سەربازانی ئەمریکا و دەنگی تەقینەوەیەک بەهێز بیستراوە.

بە گوێرەی زانیارییەکانی ئاژانسی فارس، سیستەمی بەرگریی ئاسمانی پاتریۆت لە بەرپەرچدانەوەی هێرشەکەدا سەرکەوتوو نەبووە، بەڵام هیچ زانیارییەکی نەداوە ئایا هێرشەکە مووشەکی یان درۆنی بۆمبڕێژکراو بووە.

بەرەی مقاوەمەی عێراقی لە راگەیەندراوێکدا بڵاویکردەوە، کە لە 24 کاتژمێری رابردوودا 21 هێرشیان بۆ بنکە سەربازییەکانی ئەمریکا لە ناوچەکە ئەنجامداوە.

هەروەها ئاماژەیداوە، هێرشەکان لە رێگەی مووشەک و درۆنەوە ئەنجامدراوەن.

فەرماندەیی گشتیی هێزە چەکدارەکانی ئێران و قەرارگای ناوەندی خاتەمولئەنبیا هەڕەشەی تۆڵە سەندنەوەی سەربازە کوژراوەکانی کەشتییە جەنگییەکی دێنا دەکەن.

لە پەیامێکی هاوبەشدا رایانگەیاندووە "جەنگاوەرانی ئیسلام تۆڵەی خوێنی پاکی شەهیدانی بێتاوانی دێنا دەکەنەوە و گورزی کوشندەتر لەوەی سەرەتای جەنگ لە دەستدرێژکارە ئەمریکی و ئیسرائیلییەکان دەوەشێنین".

فەرماندەیی ناوەندی هێزەکانی ئەمریکا (سێنتکۆم) وەڵام سوپای پاسداران دەداتەوە و رایگەیاندووە، بانگەشەکانی ئەم دوای سوپای پاسداران کە گوایە لە هێرشە مووشەکی و درۆنییەکاندا چەندین فڕۆکەی جەنگی ئەمریکایان لە بنکەکانی ناوچەکەدا تێکشکاندووە، هیچ بنەمایەکی راستیان نییە و چەواشەکارییە.

سێنتکۆم لە ئێکس بڵاویکردووەتەوە، هیچ فڕۆکەیەکی جەنگی ئەمریکی لەلایەن ئێرانەوە تێکنەشکێندراوە، بەڵکو فڕۆکە جەنگییەکان و هێزی دەریایی سوپای ئەمریکا بەردەوامن لە هێرشەکانیان بۆ سەر ئێران و وەشاندنی گورزی کوشندە.

بەشی پەیوەندییە گشتییەکانی سوپای پاسدارانی ئێران کەمێک لەمەوبەر 57ـەمین شەپۆلی هێرشە مووشەکییەکانی لە چوارچێوەی ئۆپەراسیۆنی بەڵێنی راستگۆیی بۆ سەر ئیسرائیل راگەیاند.

لە راگەیەندراوەکەی سوپای پاسداران هاتووە، هێرشەکەی ئەمجارەیان بە ناوی "موجتەبای سێ رۆژە"یە، گوایە بچووکترین قوربانی "جەنگی رەمەزانە"، کە لە ئامێزی دایک بە یەکەوە کوژراون.

هەروەها رایگەیاندووە، مووشەکەکان ئاراستەی ناوجەرگەی ئیسرائیل کراون، کە تێدا مووشەکی مامناوەندبڕی جۆرەکانی زولفەقار، قیام و درۆنی بۆمبڕێژکراوە بەکارهێنراوە.

پەیامنێری کوردستان24 رایگەیاد، سیستەمی بەرگریی ئاسمانی هاوپەیمانان سێ درۆنیان لە ئاسمانی هەولێر خستە خوارەوە

پەیامنێری کوردستان24 لە بەغدا رایگەیاند، درۆنێک لە نێو بنکەی پاڵپشتی دیپلۆماسیی ئەمەریکا لە فڕۆکەخانەی بەغدا کراوەتە خوارەوە.گوتیشی: ئەمشەو بۆ پێنجەمین جارە هێرش دەکرێتە سەر ئەو بنکەیە.

هاوکات سەرچاوەیەکی ئەمنی لە بەغدا رایگەیاند، پشتێنەی ئەمنی بۆ ناوچەی سەوز دانراوە و هەموو دەرگاکان داخراون.

هەروەها لە دوای هێرشەکەی سەر هۆتێل رەشید، هێزی ئەمنی لە بەغدا بڵاوەی پێکراوە و بۆ یەکەم جار سیستەمی بەرگریی ئاسمانی (سیرام) بۆ هۆتێلەکە دانرا

ئاژانسی فرانس پرێس (AFP) ڕایگەیاند، کەمێک پێش ئێستا دەنگی دووەم تەقینەوەی بەهێز لە بەغدای پایتەخت بیستراوە. ئەمە لە کاتێکدایە کە هەر ئەمشەو تەقینەوەیەکی دیکە لە نزیک ناوچەی سەوز روویدا و دووکەڵێکی زۆر لەو ناوچەیە بەرز بووەوە.

بەرپرسانی ئیمارات ڕایانگەیاند کە رۆژی دووشەممە هێرشێکی درۆنی بووەتە هۆی کەوتنەوەی ئاگر لە کێڵگەیەکی نەوتیی سەرەکی لەو وڵاتەدا، ئەمەش لە کاتێکدایە کە ئێران بەردەوامە لە هێرشە درۆنی و موشەکییەکانی بۆ سەر ناوچەی کەنداو.

لایەنە پەیوەندیدارەکانی ئیمارات ئاماژەیان بەوە کردووە کە تیمەکانیان خەریکی کۆنترۆڵکردنی ئاگرەکەن لە کێڵگەی نەوتی "شا" (Shah)، بەبێ ئەوەی هیچ زیانێکی گیانی رابگەیەنن.

کێڵگەی نەوتی "شا" کە دەکەوێتە 230 کیلۆمەتری باشووری شاری ئەبو زەبی، توانای بەرهەمهێنانی نزیکەی 70 هەزار بەرمیل نەوتی خاوی هەیە لە رۆژێکدا، ئەمەش بەپێی ئامارەکانی کۆمپانیای وزەی حکومیی ئیمارات (ADNOC).

 پەیامنێری کوردستان24 لە بەغدا رایگەیاند، هۆتێل رەشید، کە باڵیۆزخانەی بەشێکی زۆر لە وڵاتانی تێدایە کراوەتە ئامانج.

هاوکات ئاژانسی فرانس پرێس (AFP) رایگەیاند، دەنگی تەقینەوەیەکی بەهێز لە بەغدای پایتەختی عێراق بیستراوە و دووکەڵ لە نزیک ناوچەی سەوز بەرز بووەتەوە.

ئەم ناوچەیە باڵیۆزخانەی ئەمریکا، نێردە دیپلۆماسییەکانی دیکە، دامەزراوە نێودەوڵەتییەکان و فەرمانگە حکومییەکانی تێدایە، جگە لەوەی شوێنی نیشتەجێبوونی بەرپرسانی باڵا و سیاسەتمەدارانە.