سوپاسالاری ئیسرائیل لە نوێترین پەیامیدا هۆشدارییەکی توند ئاراستەی تاران و هاوپەیمانەکانی دەکات و ڕایدەگەیەنێت، هیچ شوێنێکی ئارام بۆ ئێران و بریکارەکانی لە ناوچەکەدا بوونی نییە. جەختی کردەوە کە هەر هەڕەشەیەک بۆ سەر هاووڵاتییانی مەدەنی لە ئیسرائیل، بە وەڵامێکی زۆر توند بەرپەرچ دەدرێتەوە.

لە بەشێکی دیکەی قسەکانیدا، سوپاسالاری ئیسرائیل ئاماژەی بەوە کرد کە لە ئێستادا ئێران "چەقی هەوڵە سەربازییەکانیانە"، بەڵام لە هەمان کاتدا بەرەی باکوور وەک بەرەیەکی سەرەکی و ناوەندیی دەمێنێتەوە.

سەبارەت بە دۆخی لوبنانیش، ئاشکرای کرد کە سوپاکەیان خۆی ئامادە دەکات بۆ چڕکردنەوەی ئۆپەراسیۆنەکان و دووپاتی کردەوە کە جەنگ لە دژی حیزبوڵڵا هێشتا لە قۆناغە سەرەتاییەکانیدایە.

پەیامنێری کوردستان24 لە بەغدا ڕایگەیاند کە بنکەی پاڵپشتی دیپلۆماسی ئەمریکا لە بەغدا کراوەتە ئامانج و بۆردوومان کراوە. 

هاوکات لەگەڵ ئەم هێرشەدا، سێ جار پێگەکانی هێزەکانی حەشدی شەعبی لە ناوچەی جورفولسەخر بۆردوومان کران، ئەمەش دوای زنجیرەیەک لەو هێرش و ئاڵۆزییە ئەمنییانە دێت کە ماوەیەکە ناوچە جیاوازەکانی عێراقی گرتووەتەوە.

لەبارەی هێرشەکەوە، ئاژانسی هەواڵی فەرمی عێراق لە سەرچاوەیەکی حەشدی شەعبییەوە بڵاویکردووەتەوە، هێرشە ئاسمانییەکە بەشی پزیشکی فەرماندەیی ئۆپەراسیۆنەکانی جزیرەی سەر بە دەستەی حەشدی شەعبی لە جورفولسەخر کردووەتە ئامانج و بەهۆیەوە ئەندامێکی حەشد برینداربووە.

فەرماندەیی ناوەندیی هێزەکانی ئەمریکا (سێنتکۆم) لە راگەیەندراوێکی فەرمیدا ئەو دەنگۆیانەی رەت کردەوە کە باس لە خستنە خوارەوەی فڕۆکەیەکی جەنگی جۆری (F-15)ی ئەمریکی دەکەن لە ئاسمانی ئێراندا و جەختی کردەوە کە ئەو هەواڵانە دوورن لە راستییەوە.

سێنتکۆم ئاشکرای کرد کە لە چوارچێوەی ئۆپەراسیۆنی "تووڕەیی داستانئاسا" (Operation Epic Fury)، هێزە ئاسمانییەکانی ئەمریکا تا ئێستا زیاتر لە هەشت هەزار هێرشی ئاسمانیی ئەنجامداوە و لەو ماوەیەدا هیچ فڕۆکەیەکی جەنگی ئەمریکی لەلایەن هێزەکانی ئێرانەوە نەخراوەتە خوارەوە.

ڕێکخراوی تەندروستی جیهانی (WHO) نیگەرانییە قووڵەکانی خۆی سەبارەت بە پەرەسەندنی گرژییەکانی ناوچەکە دەربڕی و رایگەیاند، جەنگ لە رۆژهەڵاتی ناوەڕاست گەیشتووەتە ئاستێکی زۆر هەستیار و مەترسیدار کە هەڕەشە لە سەقامگیری ناوچەکە دەکات.

ئاماژەشی داوە، بەئامانجگرتنی پێگە ئەتۆمییەکان لە رۆژهەڵاتی ناوەڕاست کارەساتێکی گەورەیە و مەترسییەکی جددییە بۆ سەر ژینگە و تەندروستی گشتی.

ئەمڕۆ یەکشەممە، 22ـی ئاداری 2026، محەممەد باقر قالیباف، سەرۆکی پەرلەمانی ئێران لە هەژماری تایبەتیی خۆی لە تۆڕی کۆمەڵایەتیی (ئێکس) رایگەیاند، راستەوخۆ دوای بەئامانجگرتنی وێستگەکانی کارەبا و ژێرخانی ئێران لەلایەن هەر لایەنێکەوە، سەرجەم ژێرخانە هەستیارەکان و دامەزراوەکانی وزە و نەوت لە سەرتاسەری ناوچەکە بە ئامانجی رەوا دادەنرێن و هێرشیان دەکرێتە سەر.

ئەمڕۆ یەکشممە، 22ـی ئاداری 2026، بنیامین ناتانیاهۆ، سەرۆکوەزیرانی ئیسرائیل رایگەیاند، کاتی ئەوە هاتووە سەرکردەی وڵاتانی دیکەش بێنە ناو جەنگەکەوە و هەندێکیان دەستیان بە جووڵە کردووە بەو ئاراستەیە.

سەید عەلی موسەوی، نوێنەری هەمیشەیی ئێران لە رێکخراوی نێودەوڵەتی کەشتیوانی رایگەیاند، گەرووی هورمز دانەخراوە، تەنیا دەبێت کەشتییەکان لەپێناو پاراستنی خۆیان و سەرنشینانیان پێشوەختە ئاگاداریان بکەنەوە.

بەکارنەهێنانی مۆبایلی زیرەک، ژمارەیەکی زۆری حەرێدیمەکانی ئیسرائیلی کردە قوربانیی هێرشە مووشەکییەکەی ئێران.

ئەمڕۆ یەکشەممە، 22ـی ئاداری 2026، سەباح نوعمان، گوتەبێژی فەرماندەی گشتیی هێزە چەکدارەکانی عێراق رایگەیاند، لێکۆڵینەوەکان لەبارەی هێرشکردنە سەر نێردە دیپلۆماسییەکان و باڵیۆزخانەکان بەردەوامن. هۆشداریشی دا کە ئەم جۆرە کارانە دەبنە هۆی لەکەدارکردنی ناوبانگی وڵات و گۆشەگیرکردنی عێراق لەسەر ئاستی نێودەوڵەتی.

تۆشیمیتسۆ مۆتیگی، وەزیری دەرەوەی ژاپۆن رایگەیاند، لە ئەگەری راگەیاندنی ئاگربەست لە جەنگی ئەمریکا و ئیسرائیل دژی ئێران، رەنگە ژاپۆن بیر لە جێگیرکردنی هێزە سەربازییەکانی بکاتەوە بەمەبەستی پاککردنەوەی مین لە گەرووی هورمز.