سوپای سووریا رایگەیاند، لە خاکی عێراقەوە بە پێنج مووشەک هێرشی سەر بنکەیەکی سەربازی لە سنووری پارێزگای حەسەکە.

هەروەها ئاماژەیداوە، سوپای عێراق بە سوپای سووریای راگەیاندووە، هەڵمەتێکی گەڕانیان دەستپێکردووە بۆ دۆزینەوەی ئەنجامدەرانی هێرشکەرانی سەر بنکە سەربازییەکەی سنووری حەسەکە.

پەیامنێری کوردستان24 رایگەیاند، سیستەمی ئاسمانیی بەرگریی هێزەکانی هاوپەیمانان درۆنێکیان لە ئاسمانی هەولێر خستە خوارەوە

تەلەفزیۆنی فەرمی ئێران بڵاویکردەوە، کەمێک لەمەوبەر شەپۆلێکی دیکەی هێرشی مووشەکی بۆ سەر چەند ناوچەیەکی ئیسرائیل دەستیپێکرد.

هەروەها سوپای ئیسرائیل بەگوێرەی چاودێرییەکانی هۆشداریداوە لەوەی هێرشە مووشەکییەکانی ئەمجارەی ئێران ئاراستەی باشووری ئیسرائیل کراوە، هاوکات لە شاری دیمۆنا و بنکەی ئەتۆمی ئیسرائیل لەو شارە زەنگی ئاگادارکردنەوە لە مەترسی هێرش لێدراوە.

ئیبراهیم زولفەقاری گوتەبێژی قەرارگەی خاتەمولئەنبیا دەڵێت " کۆماری ئیسلامی ئێران توانایەکی تەواوی بەسەر کەنداو و هەرێمە ئاوییەکانی عومانەوە هەیە و ژیرانە کۆنترۆڵی گەرووی هورمزی کردووە، بۆیە پێویستی بە مینڕێژکردنی رووبەرە ئاوییەکانەوە نییە".

کەمێک لەمەوبەر لە ئاسمانی هەولێر لەلایەن سیستەمی بەرگریی ئاسمانیی هاوپەیمانانەوە سێ درۆنی بۆمبڕێژکراو تەقێندراوەنەوە، بەبێ ئەوەی هیچ زیانێکی گیانی و ماددی لێ بکەوێتەوە.

فەیلەقی قودسی سەر بە سوپای پاسدارانی ئێران لە راگەیەندراوێکدا "هەواڵی دانوستانی قالیباف لەگەڵ لایەنی ئەمریکا" رەتدەکاتەوە و رایگەیاندووە "درۆیە و هیچ بنەمایەکی راستی نییە، لەم کارەدا تەنیا سێ ئامانجیان هەیە".

فەیلەقی قودس لە تۆڕی کۆمەڵایەتیی تێلیگرام بڵاویکردووەتەوە و دەڵێت دوژمن لە بڵاوکردنەوەی ئەو هەواڵە ئەم سێ ئامانجەی هەیە:

-        کوشتنی قالیباف

-          دروستکردنی ناتەبایی ناوخۆ

-          چاودێری و دۆزینەوەی شوێنی قالیباف بۆ ئەوەی بیکوژێت

ئەکسیۆس بڵاوی کردووەتەوە، وڵاتانی نێوەندگیر تورکیا، میسر و پاکستان خەریکی رێکخستنی کۆبوونەوەیەکی باڵان لە نێوان شاندی ئەمریکا و ئێران لە ئیسلام ئاباد، کە بڕیارە کۆتایی ئەم هەفتەیە ئەنجام بدرێت و ئەگەری هەیە جەی دی ڤانس، جێگری ترەمپ تێیدا بەشدار بێت.

کەناڵی 12ی ئیسرائیلی ئاشکرای کردووە، ئەو سەرکردە باڵایەی ترەمپ باسی دەکات محەممەد باقر قالیباف، سەرۆکی پەرلەمانی ئێرانە. قالیباف ئێستا وەک تەوەری سەرەکیی بڕیارە سیاسی و سەربازییەکانی ئێران دەبینرێت.

گفتوگۆکان لە نێوان نێردراوانی ترەمپ کوشنەر و ویتکۆف و قالیباف بەردەوامن بۆ گەیشتن بە رێککەوتنێکی 15 خاڵی بۆ راگرتنی شەڕ.

تڕەمپ ئاماژەی بەوە کرد کە لایەنی ئێرانی خۆیان پەیوەندییان پێوە کردوون و پەرۆشن بۆ رێککەوتن. گفتوگۆکان لەلایەن جارید کوشنەر و ستیڤ ویتکۆفەوە بە شێوەیەکی "بێ کەموکوڕی" بەڕێوەچوون. تڕەمپ جەختی کردەوە کە ئەگەر مۆڵەتە 5 ڕۆژییەکە بەبێ رێککەوتن کۆتایی بێت، بۆردومانەکان تا لەناوبردنی تەواوەتی بەردەوام دەبن.

سەرۆکی ئەمریکا ڕایگەیاند کە مەرجی ژمارە یەک، دوو و سێی ئەوان ئەوەیە کە ئێران "هەرگیز" نەبێتە خاوەنی چەکی ئەتۆمی. ئەو ئاشکرای کرد کە ئەگەر هێرشە ئاسمانییەکانی ئەمریکا نەبوایە، تاران لە ماوەی کەمتر لە دوو هەفتەدا دەبووە خاوەنی بۆمبی ئەتۆمی.

تڕەمپ باسی لەوە کرد کە گۆڕینی دەسەڵات لە ئێران بە شێوەیەکی "ئۆتۆماتیکی" روویداوە چونکە زۆربەی بەرپرسانی پێشوو نەماون. سەبارەت بە موجتەبا خامنەیی، وتی: "نازانم لە ژیاندا ماوە یان نا، بەڵام من وەک رێبەر ناناسم." ئاماژەی بەوەش کرد کە ئەمریکا بەدوای مۆدێلێکی نوێی سەرکردایەتیدا دەگەڕێت هاوشێوەی ئەوەی لە ڤێنیزوێلا روویدا.

لە ڕووی ئابوورییەوە، تڕەمپ مژدەی دابەزینی کتوپڕی نرخی نەوتی دا و رایگەیاند کە گەرووی هورمز بەمزووانە دەکرێتەوە. ئەو پێشنیاری "کۆنترۆڵکردنی هاوبەشی" گەرووەکەی کرد لە نێوان خۆی و ئەو کەسەی دەبێتە "ئایەتوڵڵای داهاتوو".

سەرۆکی ئەمریکا دەڵێت، گفتوگۆی زۆر باشیان لەگەڵ ئێران هەبووە و فەرمانی داوە هێرشە سەربازییەکان بۆ سەر دامەزراوەکانی وزەی ئەو وڵاتە بۆ ماوەی پێنج رۆژ دوا بخرێن.

هەمووی بزانە..

حکوومەتی ئەڵمانیا رایگەیاند "پێویستە زامنی ئازادیی دەریاوانی لە گەرووی هورمز بکرێت". دووپاتیشی کردەوە "گەرووی هورمز بۆ سەقامگیریی ئابووریی وڵاتەکەمان گرنگە و دەبێت ئێران دەست لە هەر کردیەک هەڵبگرێت کە ببێتە مەترسی بۆ سەر گەروورەکە".