بڕیارێکی بوێر لە کاتێکی هەستیاردا

پارتی بە پێی پەیڕەوی ناوخۆیی خۆی بڕیاری لەسەر ئەنجامدانی هەڵبژاردنە ناوخۆییەکاندا لە سەرجەم ئۆرگانەکانیدا، بێ لەو ئۆرگانانەی دەکەونە سنووری ماددەی 140 و دەرەوەی وڵات، کە لە داهاتوودا لەو ئۆرگانانەش هەڵبژاردن ئەنجام دەدرێت.

هەڵبژاردن ئەو ئامرازەیە کە سەرلەنوێ بە جومگەکانی حزبدا دەچێتەوە و لە بنکەوە تا مەکتەبی رێکخستنی پارێزگاکان دەگرێتەوە و تەوژمێکی بەهێزی نوێبوونەوە دەبەخشێتەوە بە پارتی.

راستە کاتی ئەنجامدانی هەڵبژاردنەکان لە کاتێکی هەستیاردابوو، کە بەر لە هەڵبژاردنی پەرلەمانی کوردستانە بە چەند مانگێک، لە هەمان کاتدا پێویستییەکی کاری رێکخراوەیی و دیموکراسی ناوخۆی پارتی بوو کە بوێرانە ئەنجامیدا.

لە ئەنجامەکانی هەڵبژاردن چاوەکان زیاتر لەسەر ئەو هەڤاڵانەیە کە دەنگی پێویستییان بەدەستنەهێناوەتەوە، کە زیاتر ئەو هەڤاڵانەن کە پلەیان هەبووە و جۆرێک لە دڵگرانی و ناڕەحەتییان پێوە دیارە، ئەو هەڤاڵانە دڵسۆز و بەئەزموون و خاوەن پێگەن و پارتی بۆ ئەوانە و ئەوانیش بۆ پارتین.

بەڵام ئەوەی تا ئێستا نەبۆتە جێگای تێڕامان و هەڵوەستە لەسەرکردن، ئەو کۆمەڵە هەڤاڵ و کادرانەن کە لەسەر ئاستی هەموو سنوور و ئۆرگانەکانی پارتی، لە بنکەوە بۆ رێکخراو و پاشان ناوچەکان و دواتر لقەکان و مەکتەبی رێکخستنی پارێزگاکاندا سەرکەوتن و هاتونەتە پێشەوە، لەوەش گرنگتر ئەوەیە کە زۆرینەی رەهای ئەو هەڤاڵانە گەنج و لاون و رێژەیەکی زۆری ئافرەتیشییان تێدایە.

ئەم سەرمایە مرۆییە نوێیە بۆ پارتی بە دیوێکدا دەرفەتدانە بە توانای نوێ و ژیاندنەوەی هیوایە بۆ سەرجەم کادرانی پارتی، بە دیوەکەی تریشدا رێکخستنەوە و ئاراستەکردنی پارتییە بەرمەبنای پەیڕەوی ناوخۆی خۆی، کە پێویستییەکی هەمیشەییە بۆ هەر پارت و رێکخراوێکی سیاسی.

هەڵبژاردن سەرەڕای هەر تێبینییەک کە لەسەری هەبێت یان هەبووبێت، بەڵام لە وێنەگەورەکەدا پێویستییەکی گرنگ بوو لە رووی رێکخستنەوەی ئۆرگانەکان و ژیاندنەوەی بنکە و رێکخراوەکانی پارتی کە بنچینەی لەسەروەستانی پەیکەری پارتین لە رووی جەماوەرییەوە.

داهاتوو پێمان دەڵێت کە ئەم خۆڕێکخستنەوەیەی پارتی چەند سوودمەند و کاریگەر دەبێت لە رووی جەماوەرییەوە و هەڵبژاردنی پەرلەمانی کوردستانیش باشترین تاقیکردنەوەیە بۆ دەرخستنی بەهێزیی پارتی.