حەشد و هەڵبژاردن

هەرێمی کوردستان وەک ستاتۆیەکی فیدڕاڵی دەساڵێکە بە تەواوی لەژێر جەبری یاسا توندەکانی حەشدی شەعبی و عەقڵیەتی فاشیستیانەی بڕیارە فیدڕاڵییەکانی دادگادایە، دەبێ کورد لەم هەڵبژاردنەدا مشوری ئەو ئاڵنگاریانە بخوات کە ڕووبەڕووی دەبێتەوە بەتایبەت لەلایەن بەرەی مقاوەمە و پڕۆکسیی و نوێنەرایەتییەکانیانەوە.

ئەم فۆڕمە لە دیموکراسییەتی ڕووکەش و مەسرەحیەی هەڵبژاردن لە کوردستان لە ژێر جەبری دەوڵەتێکی تۆتالیتارو کۆمسیۆنێکی مەزهەبی و دادگایەکی فیدڕاڵی جەبریدا بەڕێوەدەچێت، گومانی تێدا نییە دەمێ ساڵە خۆی ماتداوە بۆی، دۆخەکە هەرگیز لەخزمەتی ئاسایشی نیشتیمانی و نەتەوەیی هەرێمدا نییە ئەگەر کورد خۆی ڕێک نەخاتەوە، سات بەسات بەو سیاسەتەیان دژی هەرێم و دام و دەزگاو یاساکانی دەوەستنەوە، سیاسەتی ئاواندەستکەوان و ژەهرکوتانی حەشد و بێنەوبەردەی مووچە و تەوتین، سەرجەمیان فەزای ناساز و پەرتبوو، بێ هیوایی و بێمتمانەیی، درزی گەورە گەورەی دروست کردوە لەناوماند.

هەڵبژاردن و هەڵمەت و بانگەشە توندەکان نابێ پایە سەرەکیەکانی ئاسایشی نیشتیمانی هەرێم لاق و لۆق بکەن و بێخەم بین لەو دوژمنە مەترسیدارەی بەرەی حەشدو ویلایەتی فەقیە، هەڵبژاردنێکی پاک و بێگەردیش بکرێت لەم هەرێمە، عێراق دەست لەو سیاسەتە هەڵناگرێ دژی هەرێم و سبەی داوای هەڵوەشانەوەی قەوارەی هەرێم و هێزی پێشمەرگە دەکات، عێراقی حەشدی شەعبی جیاوازە لە عێراقی جەیشی شەعبی، ئەم عێراقە دیموکراسیەتی مەرجداری دەوێ لەهەرێم کە خۆی وەزیرەکان دابنێ و مەندوبەکان بکڕێ و کەمپینەکان بەڕێوەبەرێ و کابینەکە داڕێژێ و سەروکاری بکات، لەژێر چەتری کۆمسیۆن و یاساو تەوتینکردنی مووچەو ملکەچ کردنی خەڵک و سەرکزیی و بێ ئیرادەیی و سەپاندنەوەی دەسەڵاتی سەربازی و هەژموونگەریی حەشدو هاوپەیمانەکانی.

ئەوان دیموکراسیەتیان ناوێ لەهەرێم، بەڵکو گۆڕانکاریەکیان دەوێت بوکەڵە حوکم بکات و هێزێکی بێ سوپا و بێ چەک دەسەڵاتدارێتی هەرێم بکا، وەک والیە بێدەسەڵاتەکانی سەردەمی عوسمانی، سیاسەتی بەلوبنان کردن و بەسووریا کردن و بەیەمەنی کردن، ئینجا بە غەززە کردنی خاکەکەی، بۆیە ئەم عێراقە دەیەوێت هەرچۆنێک بێت دەستوور و چەک و هێزو پارەو نەوت لای خۆی بێت ئەگینا نەدیموکراسیەتی مەبەستەو نە هەڵبژاردنێکی پاک و نەهەرێمێکی ئارام و نە پەڕلەمانێکی کارای کوردستانیی.

لەگەرمەی ئیفلیج بوونی حکوومەتی شیعەی عێراق لە دوای خۆپیشاندانی تشرینیەکان و دەستلەکارکيشانەوەی عادل عەبدولمەهدی و دانانی مستەفا کازمی بەشێوەی کاتی لە 2019 تا 2021 ئەوەی حوکمی دەکرد حکوومەتی حەشد و عەسکەری وەلائی بوو تا پایەکانی دەوڵەت نەپسێ و نەکەوێ، ئەوکاتانە بۆ خۆی هیچ گرەوێکی لەسەر دیموکراسیەت نەدەکرد و تەنانەت هێزی براوەی یەکەمی هەڵبژاردنەکانی 10/10/2021 ی بە 76 کورسیەوە دوورخستەوە لە کایەی حوکمڕانی کە کوتلەی گەورەی سەدرییەکان بوو.

هەر ئەوکاتانەش ئەجێندای حەشدو لیوا و کەتائیبەکانی فەتح و نوجەباو حزبوڵلا و ڕەبعەڵلاو عەسائیبی ئەهلی حەق و دەیان گرووپ و فیرقە خەریکی بەهێزکردنی خۆیان و لاوازکردنی هەرێم بوون، باوەڕیان بە فیدڕاڵیەت و دیموکراسی و پێکەوە ژیانی ئاشتیانەو فرە ڕەنگی ئەسڵەن نەبوو باوەڕیان بەم جۆرە میکانیزم و میتۆدەش نییە کەهەرێم هەڵبژاردنی بۆدەکات، هەڵبژاردن بەڕێکردنی کات و سیناریۆیە بۆیان بۆ پڕۆژەی جەهەنمی گەورە ئەگەر سیناریۆو موفاجەئاتی نێودەوڵەتی ڕێگریی نەکات و نەیەتە پێش.

حەشد هێزێک نییە پێی بوترێت میلیشیا بەڵکو فۆڕمێکە لە مومارەسەی دەوڵەتی قوڵ، دەوڵەتی ئۆتۆکراتی جەبریی و عەسکەریی، ئەو هەژموونگەریەشیان بەکردەوە گواستۆتەوە بۆ تەواوی عێراق بەهەرێمیشەوە، لە 2016ـەوە یاسایان بۆ دەرکراوەو خاوەنی بودجەی خەیاڵی و دەسەڵاتی باڵاو پاڵاوگەو بیرە نەوت و دەروازەی گومرگین.