پەیامی سەرۆك بارزانی و فەلسەفەی یەکبوونی نیشتمانی

لە دوا پەیامی سەرۆك بارزانی، کە لە ڕۆژی 15ی ئۆکتۆبەری 2024 ئاراستەی دەنگدەرانی پارتی دیموکراتی کوردستان کرا بۆ هەڵبژاردنەکانی خولی شەشەمی پەرلەمان بەتایبەتی و جەماوەری کوردستان بە گشتی، چەند خاڵێکی سەرەکی بەرجەستە بوون، وەکوو بنەمایەك بۆ فەلسەفەی یەکبوونی نیشتمانی، بەو هیوایەی دوای هەڵبژاردن "یەك پەرلەمان، یەك حكوومەت، یەك هێزی پێشمەرگە"، دابمەزرێ و كۆتایی بهێنرێت بە هاوپەیمانیی مافیا و تێرۆر، بازرگانی کردن بە ماددەی هۆشبەر و درووستکردنی،، كە بووە بە گەورەترین مەترسی بۆ سەر ئاییندەی گەلی کوردستان.

ئەوەی ڕوونە، یەکبوونی نیشتمانی بنەمای سەقامگیری و گەشەسەندنی دەوڵەتەکانە و لە سەرووی ئامانجەکانی تری وەکوو ناسنامە و بەشداریکردنی کارا و دامەزراوەسازی دادەنرێت، جەنابی سەرۆك بارازانی پێی وایە، بەهێزکردنی هاوپەیمانێتی و پێکەوەیی کۆمەڵگەیی ۆر گرینگن بۆ یەکبوونی نیشتمانی و ئەگەر هەر زیانێك بەر یەکبوونی نیشتمانی بکەوێت، ئەوا ئاشتی کۆمەڵگەیی لاواز دەبێت و بەو هۆیەشەوە کێرڤی پرۆسەی گەشەسەندنی سیاسی لە ناو کۆمەڵگە دابەزێت و دەبێتە مایەی هەڕەشە لەسەر بوون و مانەوەی قەوارەی سیاسی.

هەر ڕابوون و ستراتیژێ بۆ گەشەپێدانی یەکبوونی نیشتمانی پێویستی بە تواناسازی و کۆکردنەوە و فراوانترکردنی سەرچاوەکان و عەقڵانی کردن و پلاندانان و ئاراستەکردنی هەموو وزەکان هەیە بەرەو دەستەبەرکردنی ئەو ئامانج و دیدگایانەی، کە کۆمەڵگە و دەوڵەت پێی پەسەندە.

وەکو فەلسەفە دەکرێ یەکبوونی نیشتمانی ئاماژەیەك بێت بۆ یەکخستن و پێکەوەژیان لە چوارچێوەیەکی نەتەوەییدا، کاتێ تاکەکان و کۆمەڵگەکان هەوڵ دەدەن، بۆ ئەوەی بگەن بە تێپەڕاندنی جیاوازییەکان و دابەشبوون، هەروەها بۆ ئەوەی لە ژێر یەك ئاڵادا بە یەکگرتوویی بمێننەوە.

ئامانجی سەرەکی ئەم فەلەسەفە و تێڕوانینەی جەنابی سەرۆك بارزانی برەودانە بە هاوکاری و سەقامگیری لە نێو کۆمەڵگەی هەرێمی کوردستان، هەروەها برەودانە بە سەربەخۆیی نەتەوەیی و یەکگرتوویی کولتووری و سیاسی.

باوەڕبوون بە داهاتوو وەکوو درێژەپێدەری ئێستا، و ئیلهام وەرگرتن لە مێژوو و ڕێبازی پیرۆز و ڕاستەقینەی گەلی کوردستان، بۆ ئەوەی یەك هەرێم و یەك پەرلەمان و یەك حكومەت و یەك هێزی پێشمەرگە هەبێت و كۆتایی بە هەرچی كاری نایاساییە بهێندرێت.  

بە خۆشحاڵییەوە دەتوانین بڵێین، بەهۆی هەوڵە بەردەوامەکانی جەنابی سەرۆك بارزانی و سیاسەتی حەکیمانەیان بۆ چەسپاندنی ئارامی و ئاوەدانی، پێکەوەیی و خۆڕاگری کاری بەرچاو ئەنجامدراوە  و هەرێم بووە بە نموونەیەكی پێشەنگی ناوچەکە، هەر ئەمەش بۆتە هۆکاری ئەوەی هەرێم لەسەر ئاستی هەرێمی و نێودەوڵەتی ستایش بکرێت. 

تا کوردستان خاوەند سەرکردەیەکی مەزنی وەکوو جەنابی سەرۆك بێت، کە خاوەندی بیرۆکەی هەڵبژاردن و چەسپاندنی دیموکراسییەتە لە هەرێمی کوردستان، ئەوا پێویستە گەلی کوردستان لەوە دڵنیا بێت، کەوا نیشتمان لە دەستیكی ئەمینە، دواجار شکۆمەندی و سەربڵندی هەر بۆ نیشتمانپەروانە.