لە مەلای جزیرییەوە بۆ باوەشی هەولێر..پلانی سەرۆک بارزانی بۆ ئاشتی و یەکبوونی کورد

لە کاتێکدا ناوچەکە گۆڕانکاریی گەورەی بەسەردا دێت و هەمووان چاوەڕێی ڕووداوی نوێن، سەرۆک مەسعود بارزانی بە سیاسەتێکی زۆر ژیرانە، دوو دەرگای گەورەی کردەوە، دەرگایەکیان لە شەڕناخ و جزیری بۆتانـەوە بۆ ئاشتی لەگەڵ تورکیا، دەرگایەکیشیان لە هەولێرـەوە بۆ برایەتی و یەکڕیزی لەگەڵ ڕۆژئاوای کوردستان، ئەم دوو هەنگاوە پێکەوە، پلانێکی تەواون بۆ ئەوەی هەم شەڕ نەمێنێت و هەم کورد بەهێز بێت.

سەردانە مێژووییەکەی سەرۆک بارزانی بۆ باکووری کوردستان و بەشداریکردنی لە یادی زانای گەورە مەلای جزیری، پەیامێکی زۆر ڕوون بوو بۆ هەمووان، سەرۆک بەم سەردانە بە تورکیای گوت: باشترین ڕێگە بۆ ئاشتی، ڕێزگرتنە لە مێژوو و گەورەکانی کورد. زیندووکردنەوەی ناوی مەلای جزیری کە سیمبولی خۆشەویستی و ئاشتییە، زەمینەیەکی زۆر باش خۆش دەکات بۆ ئەوەی گفتوگۆی نێوان تورکیا و پەکەکە سەرکەوتوو بێت، بارزانی دەوێت بە هەمووان بڵێت کە زمانی گفتوگۆ و برایەتی دەتوانێت ئەو گرێیانە بکاتەوە کە بە ساڵانێک شەڕ و خوێنڕشتن نەکرانەوە، بۆیە دیسانەوە بووەتەوە بە کلیلی ئاشتی لە ناوچەکەدا.

لە هەمان کاتدا و شانبەشانی ئەم هەوڵە بۆ ئاشتی لە باکوور، لە هەولێری پایتەختەوە دیمەنێکی دیکەی زۆر گەورەمان بینی، ئەویش پێشوازیکردنی سەرۆک بارزانی بوو لە مەزڵوم عەبدی، فەرماندەی هێزەکانی سووریای دیموکرات، ئەم دانیشتنە تەنیا دیدارێکی ئاسایی نەبوو، بەڵکو سەلماندی کە هەولێر ماڵی گەورەی هەموو کوردە بێ جیاوازی. 

بارزانی بەم کارەی، پشتیوانییەکی گەورەی بۆ ڕۆژئاوای کوردستان دەربڕی و هانی دان کە یەکدەنگ بن، واتا لە کاتێکدا سەرۆک لە باکوور هەوڵ دەدات ئاشتی دروست بکات، لە باشووریش باوەش بۆ ڕۆژئاوا دەکاتەوە تاوەکو هەمووان یەکڕیز بن و بەهێزتر دەرکەون.

کەواتە، ئەوەی ئێستا دەیبینین یەک نەخشە و پلانی سەرۆک بارزانییە، لە لایەک بە بەکارهێنانی ناوی ،مەلای جزیری"،دڵی تورکیا نەرم دەکات بۆ ئاشتی و کۆتاییهێنان بە شەڕ، لە لایەکی دیکەشەوە بە باوەشگرتنی ،مەزڵوم عەبدی،، هێز و ورە دەبەخشێتەوە بە کورد، ئەم سیاسەتە ژیرانەیە، کورد لە پەرتەوازەییەوە دەکاتە یەک دەنگ، ناوچەکەش لە شەڕەوە بەرەو ئارامی دەبات.